香港佛教聯會噚日宣佈，為慶祝回歸十周年，特登整咗個叫「吉祥鐘」嘅銅鑄大鐘，6月30號嗰晚10點喺文化中心海旁大道舉行「鳴鐘大典」，到時會由108位高僧誦經，仲請埋200幾位來自中、港、台、東南亞等地嘅高僧嚟為香港祈福，據聞中央都會派領導人嚟同嘉賓一齊敲鐘。
講番個大銅鐘，高四呎，直徑三呎，成800公斤重，上面刻有國學大師饒宗頤親撰嘅鐘銘。聽佛聯講，個鐘喺韓國造，因為嗰邊造嘅鐘質素高啲音色靚啲，造價成6、70萬，由善信捐獻承擔。不過市民想睇鐘就要等吓喇，因為鳴鐘大典只係畀受邀請人士出席，市民只可以坐喺屋企睇直播。典禮完咗之後，民政事務局會將個鐘永久安放喺一個地方畀人參觀，到時市民應該可以敲吓個鐘，清淨身心。