「可否不分膚色的界限，願這土地裏，不分你我高低……」全世界近年打擊種族歧視不遺餘力，歌仔都成日有得唱，可惜國際性足球比賽仍然出現歧視黑人場面；周日英格蘭U21兩位黑人後衞奧奴夏同賀廸，齊齊受到塞爾維亞球迷歧視性侮辱對待，搞到歐洲足協要立即成立小組處理。
塞軍球迷侮辱奧奴夏
其實塞爾維亞種族歧視已經有前科，00年拉素後衞米赫洛域（當時國籍為南斯拉夫），喺歐聯賽事就向阿仙奴黑人中場韋拉作出種族性侮辱，結果被重判停賽6場；估唔到球星係咁，球迷又係咁，周日U21歐國盃B組最後一輪分組賽，塞爾維亞對住英格蘭，塞軍球迷上半場已不斷用馬騮叫聲挑釁奧奴夏，半場休息時又向賀廸挑釁。
好在英格蘭小兵不受影響，黑人前鋒列達上半場5分鐘已先開紀錄，下半場更有一記靚絕倒掛，僅被塞軍門將救出；到77分鐘，英軍前鋒達比舒利冇理會塞軍有球員受傷，照樣單刀射入，唔算太光采下，以2:0勝出。
歐足協調查事件
塞爾維亞真係多得班球迷唔少，事關佢哋今仗贏定輸，都可以B組首名出線，周三對住A組次名比利時，𠵱家歐洲足協成立專責小組，有咩處罰都未知；而英格蘭化悲憤為力量，贏波取得次名出線，將硬碰主辦國荷蘭；相反同日另一場比賽，意大利雖然以3:1大勝捷克，最終都出線無望，僅排第3位，周四就同A組第3位葡萄牙加插一場附加賽，爭奪北京奧運入場券，提提大家，足智彩絕不放過任何開盤機會，呢場附加賽一樣接受投注。