大摩全球首席經濟師羅奇，將於9月嚟香港出任大摩亞洲區主席新職務；佢喺大摩做咗經濟師有四分一世紀，有成25年咁耐，而今個月中佢發表最後一份經濟報告，暢談呢四分一世紀發生嘅經濟大事。
喺1982年至2007年間，羅奇做過好多經濟預測，佢自爆估得最差嘅一次，係低估咗90年開始嘅資訊科技年代下，新科技對經齊嘅影響。查實羅奇又唔使咁自責，佢只係經濟學者，對新科技唔認識唔出奇。
驚訝世界適應得快
回想過去25年，佢話美國生產力復興係重要發展里程碑之一，喺82年初入行時，美國嘅生產力平均增幅只有1%，但時至今日已升至接近2.5%。佢喺90年代初期，分析話係因為美國夠創意，富彈性，肯冒險同放開監管嘅結果；不過到90年代中期，佢就轉而認為應該係資本機器密集替代咗人手，加上資訊科技革命嘅成果所致。
另外兩個重要發展里程碑，係通貨緊縮時代來臨，以及全球經濟一體化。而最令佢感到驚訝嘅係「速度」，世界好快掌握到生產力同全球化呢啲轉變，通脹年代亦好快結束。
今日嘅世界同25年前已經好唔同，羅奇話會好好回味因轉變所引發起金融市場嘅激辯，呢個係難能可貴嘅經歷。𠵱家，佢又要為下一個巨浪嘅震中點亞洲區出發，迎接新挑戰。