舊年，美國唔少大藥廠因為多種暢銷藥嘅專利權到期，盈利受壓；今年，藥廠透過併購同業增加市場佔有率同減價，情況已經轉好。網民喺《華爾街日報》網上版嘅討論區，就呻藥廠推出新藥嘅價錢太貴、食水太深。
RogerTheriault好不滿咁話：「索價太高根本係一種罪過，藥廠花費太多錢做推廣，其實咪又係病人畀錢。」
怨廣告費轉嫁病人
rridgeley附和：「藥廠應該停止賣電視廣告，反正冇乜有用資訊畀觀眾。再者，好多所謂嘅新藥只不過係新瓶舊酒，都唔算係全新研發，根本唔需要向藥廠發專利權。」
jdfree就認為，「負責研發嘅員工薪酬高、研究開支沉重，藥物通過認可前，又要進行一年又一年嘅測試，所需設備昂貴，人力物力開支超高，藥廠又要有可觀嘅利潤向股東交代，藥價點會唔高！」
藥廠賺錢天經地義
不過，亦有網民認為藥廠打開門做生意，賺錢天經地義，消費者嫌貴可以唔買。HansenSW說：「新藥面世前，藥廠先要花一大筆錢研製，佢哋有自己一套定價標準去抵銷成本開支，仲要有足夠利潤支持未來營運。隻藥值唔值得咁嘅價，消費者有話事權，唔鍾意咪買過另一隻囉！」
jamesschaad亦力撐：「我哋係行外人，對藥廠運作一知半解，甚至完全唔清楚佢哋面對嘅風險，唔應該懶醒一口咬定藥廠牟取暴利。」