碧咸離開皇馬前，卒之攞到西班牙甲組足球聯賽冠軍獎牌，叫做有個大團圓結局，走得開心。唔過癮嘅就係皇馬嘅會長與領隊，今年一月佢哋講到明要碧咸鬆人，會長卡特朗話碧咸係一個足球場上嘅荷李活明星（即係在球場上做戲），領隊卡比路話碧咸水皮。佢哋賣走碧咸之後，卡比路話明以後唔會畀碧咸出場。
正是世事無絕對，皇馬在聯賽榜落後，傷兵滿營之下，卡比路逼住叫碧咸出場頂檔。碧咸係冇施丹咁有創造力，冇朗拿甸奴咁有速度活力，但佢嗰隻黃金右腳，世上無出其右，傳中波落點之準繩，歷來罕有。皇馬前鋒雲尼斯達羅唔係杜奧巴、朗拿度一類前鋒，最叻就係到禁區等機會執雞，冇人傳中畀佢，佢就得個「捐」字，一有碧咸傳中到佢嘅頭頂或腳下，就成個人生晒。呢招凡係球迷都明白，偏偏就係啲教練唔明，真令人奇怪。卡比路與麥卡倫都係聞到魷魚香之故先至起用碧咸，證明個人偏見好有毒害性。
本來左丁山對碧咸並不太欣賞，但此位大明星竟然能夠在逆境，飽遭白眼之餘，拚命苦練，一有機會就上場演出真功夫，佢嗰份專業精神真係值得尊敬。其他少爺球星如果身處碧咸嘅困境，多數會與靚太太盡情遊樂，玩到季尾就拜拜去LA搵銀嘅嘞。碧咸貌似少爺，但內心奮鬥精神似米高佐敦，好嘢。年青人崇拜碧咸，唔好淨係睇佢花fit享樂一面呀，要睇最近一年碧咸點樣應付逆境先至學到嘢。
英女皇壽辰授勳名單中，好多英國體壇人士得MBE、OBE及爵士，足球員之中有傑斯獲OBE，舒寧咸獲MBE，碧咸就冇份，有人話係佢太太維多利亞形象太差，首相貝理雅唔鍾意所致。或者等到碧咸移居LA，不時飛足十一個鐘頭返歐洲幫英格蘭上陣有功之後，先至可以攞到勳章。有人計過，如果碧咸繼續代表英格蘭場場上陣嘅話，從LA飛倫敦，會飛足十萬英里與一百八十小時，好驚佢會患上DVT（deep-veinthrombosis血管栓塞），大腿嚴重受損，而且會經常傷風㖭！