夏日嘅香港熱到爆，着衫梗係越少越簡單就越清爽，披披搭搭仲點頂？一向賣開靚樣嘅HondaStream，都搶住換個夏日新Look登場，睇外觀，飛甩咗車身兩側嘅包圍，亁淨利落；睇內櫳，由黑轉米白，望落已經透心涼。規格亦較2.0RS-Z更加平易近人，連價錢都一樣輕磅咗。總之，一切從簡！
記者：黎頌詩
攝影：周旭文
模特兒：Tiffany（TheGroup）
減 包圍賣相簡潔
喺中小型七人車裏面，HondaStream一向都有唔少捧場客，其實唔難理解，無疑佢嘅外形夠年輕，車身睇落好輕巧，唔似大部份七人車畀人好笨重嘅感覺，第二代2.0RS-Z就更型，動力同外形都跑味十足，曾經創下到港不出兩星期就賣出200部嘅佳績。然後，到呢部1.8版本，感覺係一次反璞歸真。整體線條同RS-Z無大分別，但第一感覺，斯文咗！喺1.8版本身上，唔見咗甚有辣味嘅網紋鬼面罩同車側包圍，跑味大大減低。娘晒？無可能！車身落得簡潔大方，而襯番超型車頭同車尾設計，風采依然！一入Honda網頁，大大隻字賀Stream攞咗06-07CaroftheYear嘅TheBestValue大獎，有乜辦法唔對佢另眼相看！
減 三萬七搶客
話明減低跑味，當然唔係得個樣，規格上都一樣配合番，你可以話係比2.0RS-ZDowngrade咗，馬力細咗之餘，七前速半自動波連+/-波撥片變成五前速自動波，玩味係少咗，不過車呢樣嘢我會着重夠唔夠用；有啲人會好多要求，想載多啲人、多啲嘢之餘，又鍾意玩吓嘢，最好就一架車乜都齊，咁當然付出嘅價錢亦都要相應高啲。C記自問唔好玩車，有勁車當然欣賞，不過始終最緊要好揸實用，講真即使畀架超級跑車我都唔知點算！140匹馬力，操控更加有自信。再計落條數，Stream1.8賣$188,880，比2.0RS-Z（$225,880）平成三萬七蚊，點揀？我就諗都唔使諗。
減 空間略嫌狹窄
變得最少嘅應該係內櫳，最大分別係全部變淺色，熱辣辣，梗係新Look嘅米白睇落醒神過舊款嘅黑色啦！查實呢架Stream又真係好啱全家出動，體積只比私家車大少少，公公婆婆上車都方便啲啦！有利就有弊，空間感始終唔多足夠，車頂亦較低，第二排坐三個人已經有壓迫感，第三排更甚，如果全家都係大隻佬嘅話真係諗過先。有驚喜係座位舒適度竟同房車有得揮，尤其拉低手枕，感覺軟熟，以佢房車嘅輕巧外形，但可載多兩人，兼且內櫳設備有相當水準，已經難能可貴。
有利就有弊，車身體積小巧易操控，最兩難便是令尾箱容量縮細。
HondaStream1.8規格
引擎：1,799c.c直4i-VTEC
馬力：140ps/6,300rpm
扭力：17.7Kgm/4,300rpm
傳動：5前速自動波，前輪驅動
設備：6CD音響、遙控電趟門、泊車警示器
查詢：合群汽車（28278622）
