父親節阿仔主動拖住老爸的手，一高一矮上酒家男廁，撇下我一個人。還以為帶他上廁所是我這個廿四孝阿媽的必然責任，阿四嘛，預咗衣食住行洗熨執漏瓣瓣做齊，如廁這件大事，卻有意外驚喜。阿仔的「性醒覺」似乎比人快一步，知道蹲坐着的阿媽非我族類，很快已經認定家裏「企硬」的大人，才是埋堆的明智之選。我本來就是腌尖鬼，很高興可以甩難，感謝阿仔給我這個「方便」。
從上廁所找伴揀中老爸的舉動預測，阿仔將來揀女朋友，也會捨老媽意見，親近老爸的品味，跟他咬耳仔交流追求心得，阿媽只能隔門偷聽，間中通電郵旁敲側擊博他洩露口風。不過，阿仔搵阿爸做追女軍師的決定，有可能是錯的。他很快會發現，老爸那一手，已經沒法與時並進，成功率相當「董建華」，搞不好，還會是災難性的手尾長。捫心自問，我這個阿媽未必「做得好呢份工」，但幫阿仔手討女仔歡心，應該不會幫倒忙。就算是茶煲港女，總有死門穴位，阿仔性格能攻能守，問題不大。倒是港女阿媽難招架，我至憎費神應酬別人阿媽，這種苦差，無可奈何，又得老爸頂硬上照鯁。我旁觀所得，孩子的爸在師奶堆中，沒受到排斥歧視，相反還頗有師奶緣。看來，阿仔真是投對了胎，揀啱了性別。大家被他三歲人仔厚臉皮團團轉追女仔的蠻勁逗得大樂，我就幻想他帶着通身HelloKitty的嗲妹回家時，我的臉色能有多難看呢？