一連三日、日日由朝打到晚嘅「世界麻將大賽」，噚日凌晨終於塵埃落定，由香港雀壇老手許宗澧捧走冠軍，兼贏到390萬港幣。八方噚日下午打電話畀新晉雀王，想問吓佢嘅感受同點用筆獎金，殊不知許太做咗雀王代言人，話老公正休養生息瞓晏覺，未來幾日會喺澳門唞一唞，暫時謝絕傳媒訪問。
連打三日牌真係幾辛苦，付出體力之餘仲要精神，除要牛咁眼昅住另外三家打過乜嘢牌、做乜嘢牌，打邊隻牌都要計過度過。屈指一算，許雀王一共打咗40圈牌，即160鋪先攞到冠軍，佢打完之後好似老咗10年咁，殘到兩個眼袋大過熊貓。不過雀王贏到咁多獎金，不妨買啲人參、燕窩補一補，相信好快可以回復精力。