新Game王：SHADOWRUN組雜牌軍<br>殺敵靠圍

新Game王：SHADOWRUN組雜牌軍
殺敵靠圍

繼《藍龍》後Xbox360太耐冇出大作，新到的《SHADOWRUN》正好餵飽一班餓game迷。咪以為佢係普通射擊遊戲，實情玩家用槍同時，亦可以魔法上陣殺敵，可謂「RainbowSix魔戒版」。而且利用XboxLive，可上網連同PC版網友組隊圍攻，最勁可以16人對峙。
記者︰陸俊雄

射擊加魔法爭勝

故事背景在2031年未來世界，遠古魔法消失5000年後再度出現，全球不同組織為駕馭呢股魔法力量，打生打死。玩家可選擇身為人類、精靈、矮人或巨人（勁似魔戒），再加入名為「RNA」的企業集團，或加入「闇影聯盟」游擊隊，為奪魔法主導權而戰。勝利條件可揀「敵全滅」或「奪聖物」，打低對手就會賺得一定金額購買武器、魔法或科技，在下次mission中使用。以往第一身射擊遊戲，就真係只有射擊，《SHADOWRUN》創新在加入魔法，如PRG遊戲中經常出現的急call召喚獸技術；用特殊武器或日本刀時，亦會有第三身動作出現。

■魔法勝在天馬行空，唔使自己出手，可叫召喚獸代勞。

■食人妖力量十足，但慢手慢腳。

■精靈係型，不過生命力較弱。

跨平台連線圍攻

《SHADOWRUN》另一賣點係可連同PC版WindowVista做主機玩家，最多16人同時上網組隊對戰。此game推出咗Xbox360版和PC版，只要透過XboxLive上網服務，就可進行圍剿戰。同好多onlinegame一樣，隊友間可作私下交談，團隊又不分種族，即人類、精靈等可以共存。身為隊長更可發號施令，十足《RainbowSix》策略性擊到對手為止。最搞笑係隻game有公投，投票踢走冇料到的隊友，所以諗住「靠黐」的話，分分鐘被叮走。