講到高達RX-78，套一句「自護」之餘孽的說話，真係「白色之惡魔」！由模型到唔使砌嘅膠公仔，出咗20多個年頭，出極都有！而剛派貨的SHCMProRX-78，又係一件叫粉絲愛不釋手的產品。
雖然唔似得模型咁玩解甲，但全身可打開的裝甲位置，達14處之多，裏面仲要有精密機件，真係完全另一個境界。至於附件方面，亦係玩大堆頭，包括有修理倉地台，核戰機、火箭炮、激光槍同盾牌等，最過癮係元祖粉絲至愛嘅流星鎚都有埋，乜都唔搞都可以砌出個靚靚情景，所以好多玩家都話，今次出得比以往FIX系列更出色。
行落旺角各大玩具舖打咗個白鴿轉，基本4百尾一隻完全走唔甩，價位完全拍得住《聖衣》新話。暫時聽番口碑唔錯，睇嚟Bandai會繼續放毒落去！
記者︰陸俊雄