香港嘅銀行業發展從來不甘後人，博思艾倫顧問研究公司最近出咗份報告，內容指喺17個國家共100家銀行裏面，香港嘅零售銀行表現最出色，分行、CallCentre及流動銷售隊伍三方面更遙遙領先，瑞士都只係排第二，第三係美國。
調查指香港零售銀行嘅分行，設計方面好有品味，好似酒店大堂咁，有埋互動電視，所以攞到好高分；至於CallCentre方面，唔使等好耐就有真人接聽，喺今時今日的確好令人感動；而香港銀行嘅流動銷售隊伍，更加可以喺短時間內隨時約見到。
個別銀行嚟講，香港滙豐銀行嘅分行及流動銷售隊伍表現最佳，而喺英國嘅花旗銀行就喺客戶中心方面做得最好。
《新西蘭先驅報》有刊登呢份報告，佢哋最關心自己或鄰近地區嘅成績，可惜調查冇預新西蘭，而鄰居澳洲又唔爭氣，冇乜表現，但該報記者就好鬼馬咁話：或者邵銘高上任澳紐銀行後，澳洲嘅銀行前景會亮麗啲。