回歸前任規劃環境地政局局長嘅梁寶榮，回歸後一年就被人掟咗去北京做開荒牛，做首任駐京辦主任，結果一去不回頭，一做就做咗八年，舊年正式退休，喺北京開埋餐廳做老闆。
寶官噚日接受商台訪問時強調，唔覺得因為做過肥彭私人秘書，令佢回歸後即刻俾人「放逐」，因為好似佢呢啲小腳色，根本冇份參與殖民地政府嘅核心會議，佢都只不過係幫老闆執行工作啫，外交政治嘢一律冇份，咪以為佢嘅任務真係咁特別得㗎。
係唔係放逐八方唔敢講，但好肯定寶官條命水冇鬍鬚曾咁好，因為鬍鬚曾一樣擔任過肥彭私人秘書，但官運就節節上升，未來局長又有佢份。講到尾，都係睇你泊唔泊到好碼頭，寶官冇埋煲呔堆，自然冇得怨。