剛為人父嘅張繼聰、噚日同葉翠翠喺尖沙嘴出席名為「古靈精怪daddy大晒」嘅父親節活動，張繼聰話囝囝張瞻趕得切喺父親節前出世，係佢同爸爸最好嘅父親節禮物，佢話：「太太（謝安琪）今朝已可以落吓床行吓，我啱啱喺醫院同父母交更，因為我要出嚟做嘢，大家喺醫院食咗少少嘢當慶祝今日父親節。」佢之後仲解釋點解太太生咗佢又唔認，原因係想安頓好一切，以及同唱片公司溝通好先講。
葉翠翠走音眼濕濕
此外，葉翠翠嘅父母同愛犬噚日都有到場陪翠翠工作，順道慶祝父親節，翠翠原本要喺台上唱出《世上只有》及《遇見》獻給台下嘅父親，但點知佢帶去現場嘅音樂帶壞咗，而要清唱，結果搞到走音兼甩嘴，令到翠翠甚為尷尬，事後接受訪問仲眼有淚光，佢話：「諗住送首歌畀爸爸，估唔到搞成咁，下次我要有埋要清唱嘅預備。」提到日前佢同經銷道地飲品系列的滙泉國際有限公司董事方振文食飯約會，翠翠話：「大家唔好誤會，我哋只係普通朋友食飯。」
