真係好耐冇放過悠長假期，早排去咗日本玩咗成個月，點知返到屋企收到互聯網服務商寄嚟嘅月結單，竟然比平日多咗百幾蚊，咪打去服務商投訴。職員話我個電子郵箱爆晒，郵件超過免費儲存額，要收附加費。我發咗顛狂鬧，係啲垃圾電郵湧埋嚟，我都控制唔到。最終佢都肯酌量減啲，但乜嘢心情都冇晒。
早幾日同消委會啲老友呻，老友話消委會都收到唔少呢啲投訴。佢教路話唔想白花寃枉錢，可以搵一啲互聯網服務商，有提供電子郵件一旦超額後，就自動停止接收電郵嘅服務；或者儲存量到達警戒線，會發出警告訊息提醒客戶。老友又話，如果好似小妹咁去旅行上唔到網，又或者電腦發生故障等，某段日子內唔會開啓戶口檢收電郵，就要盡早通知互聯網服務商作特別安排。
佢仲叫我定期刪除收件匣同資源回收箱內嘅無用郵件，唔好以為丟咗落回收箱就冇事，一樣會佔用儲存量。吓，點解冇人早啲話我知？
逢周一至周四刊出