時間：01年4月
地點：灣仔
人物：成龍、章子怡
經過：升格為國際女星嘅章子怡，回想佢6年前都未走紅，所以當佢有得同成龍合演電影《火拼時速2》嗰陣，就梗係爭取機會冧掂對方，希望帶挈佢晉身荷李活。唔知係咪咁，章子怡喺片場無時無刻都對成龍服侍周到。
當日喺片場嘅章子怡，唔單止主動幫成龍揼骨，同為佢整理亂咗嘅頭髮，仲不時發放姣功，除咗坐喺成龍大髀上之外，又主動拎提子餵成龍，而最令人感到惡心嘅係佢之後仲攤大手板，接番成龍吐出嚟嘅提子核，不過當正自己係皇帝咁畀婢女服侍嘅成龍，就當然好受落。章子怡嘅冧功咁掂，難怪佢可以火速上位。
大做真人騷
除咗餵提子，當成龍飲完樽水遞畀身邊嘅章子怡時，佢即順手拎嚟飲，一臉甜絲絲，顯見兩人關係有幾咁親密。
近年，章子怡身邊男伴如車輪轉，最新鮮熱辣嘅當然係華納電影公司高層男友ViviNevo，自從佢哋高調晒戀情後，兩人秤不離砣，仲唔介意喺公開場合大做真人騷，公演恩愛。
本欄逢周一至周六刊出