昨日父親節，羅啓仁的心情明顯平復了不少，但他透露由始至終李賽鳳都沒向他說過一聲對不起，昨日他在電話中說：「佢永遠唔覺自己做錯，佢好好強，只係話自己失控，唔係佢自己挑選嘅。我勸過佢企出嚟承認自己做錯，同大家講聲對唔住，同老公講聲對唔住，但佢唔肯。𠵱家都唔係道歉嘅問題，我可以原諒佢，但唔可以忘記。」
羅啓仁指李賽鳳兩個月前仍想挽救這段婚姻，但遭他拒絕，他說：「我唔得，我考慮咗9個月，我同佢講話好難，自己嘅太太做咗一件最冇良心、最離譜嘅事，而且唔係一日兩日，總之絕對唔係短嘅時期，我一生人都未聽過呢個咁嘅古仔，最冇譜嘅婚外情居然發生喺我身上，但我唔可以俾佢困住我一生，我一定要重生。今次係被迫透露真相，對我嘅心情有解放嘅力量。」
對兒子感抱歉
問到李賽鳳現時有否經濟上的問題？羅啓仁說：「梗係冇以前咁好啦，但又唔會餓得死，佢仲有間跳舞學校，我覺得佢想補救婚姻都係因為經濟，唔係因為感情。」
有指羅啓仁公開事件是因李賽鳳索取巨額離婚賠償，他否認說：「分幾多身家係法官決定嘅，美國嘅法例係計喺婚姻過程之中賺咗幾多錢，最方便係一人一半，報道出街對法官嘅決定絕對冇影響，因為登嘅係中文報紙，律師亦唔可以拎出嚟當係乜嘢證據。分畀佢個心都唔會唔舒服嘅，法律係咁就係咁，冇話公唔公平。」
羅啓仁又指對李賽鳳與前夫所生的10歲兒子感到抱歉，他說：「佢之前一直同我住，我曾經同佢講，爸爸呢世都唔會離開你，但係𠵱家被迫離開佢，至於養女，係我同李賽鳳結婚之前已經領養嘅，當然係跟我。」