林保怡母親林梁容好於本月4日，喺沙田威爾斯醫院病逝，享年84歲，噚日保怡喺沙田寶福紀念館，為母親設靈。喪禮採佛教儀式，靈堂佈置以白色為主，莊嚴雅致，陳志雲同陳豪都有送花牌去。
保怡同馮仁昭憶述佢媽媽嘅病況，佢話媽媽病咗成年先離開，啱啱保怡喺巴黎拍緊戲，要即刻趕返港，佢話：「媽媽好叻，等埋我返嚟先走。」保怡一向好孝順，一直同父母同住，同媽媽感情好好，佢又話：「孝順平時都要做，但唔係成日宣傳住，我一有時間就陪佢哋去旅行，媽媽喺我懷中離開㗎。」保怡辦完媽媽喪禮，就會去珠海同青島繼續拍《珠光寶氣》。
「冇cut黎姿戲份」
此外，樂易玲噚日喺尖沙嘴出席活動，由於黎姿家陣日夜奔波照顧車禍入院嘅胞弟黎嬰，所以暫時停止拍攝《珠光寶氣》嘅工作，噚日樂易玲就開腔話：「個拍攝進度係慢咗，但因為之前香港成日落雨，所以香港嘅戲份都慢咗，而呢齣劇都預咗12月會完成，𠵱家要等黎姿情緒好啲先可以復工，以我所知到𠵱家都未聽過會cut黎姿嘅戲份。」
