第4胎嚟喇？世人皆知，「萬人迷」碧咸兩公婆恨女心切，雖然佢哋生咗3個「得意仔」布魯克林、羅密歐同告魯斯，但大家都期待佢哋第4胎來臨，好似「皇帝唔急太監急」，而最近就有身體語言學家從兩口子近期嘅行為推測，第4胎快將喺洛杉磯誕生！
碧咸4月份喺巴黎同老婆維多莉亞行街街時，「辣妹」多次喺大庭廣眾前，以孕育小孩嘅偉大胸部「頂撞」老公身體，更喺一書店門外，擘開雙髀，以腳尖對住老公「下盤」，時而將下巴放喺老公肩上，時而翹起圓股猛頂碧咸大髀外側等等；該資深身體語言學家分析指，「辣妹」係希望老公畀多啲安全感佢，以及潤澤佢心靈同身體。
挺胸翹籮乜都齊
性格剛強嘅「辣妹」，近期收起晒以往嘅防衞性肢體語言（如雙臂交叉於胸前），反而經常挺胸翹籮，好似想「誘惑」老公同佢行房。當碧咸輕摸老婆大腿內側時，後者就露出靦腆神情，彷彿用雙眼表達「咦，好衰㗎！」，而碧咸見狀，就即時興奮地閃出招牌笑容，就如小貓見到大魚嘅「色相」，語言學家話係隱藏住「老婆，我嚟喇！」嘅暗號！
語言學家推斷有理
事實上，碧咸紋身處處，但偏偏左手就留咗空白位，外界估計係為第4胎而設，所以語言學家嘅推斷都有啲道理嘅！不過，我求大俠自問對呢門學問認識唔深，亦唔否認肢體動作可反映個人心理狀態，但我聽完一大堆分析後，又分唔清碧咸夫婦嘅親密行徑同一般夫婦有乜分別喎？