轆Book：韓流整形大變身<br>Carens薯嘜變靚女

轆Book：韓流整形大變身
Carens薯嘜變靚女

我以前見過KiaCarens，總係覺得佢笨笨實實，外形普通又唔靚，兼無咩線條可言，最深印象都係一個字：平（當然係個價錢）！
之不過，老編有日突然叫我介紹啱啱喺早前到港嘅第三代Carens，心入面第一個諗法係：「吓？介紹部薯車？」上頭指令到惟有頂硬上，點知第一眼見到部車嗰陣就大叫咗一聲：「嘩，做咩靚仔咗咁多！唔通韓國整容風由人吹到去啲車身上？」

記者：梁美甜
攝影：陳偉強
模特兒：Gloira（Umovie）

香車大翻身　薯頭變型仔

見過上一代Carens嘅人都一定有我呢個感覺，上一代無論外形同內櫳都真係好保守兼笨拙得很，年輕人一定唔敢坐上去；但新一代Carens就完全唔同晒，睇得出廠方喺外觀上落咗唔少心機，車頭加裝兩盞霧燈之外，車身線條流暢咗兼加有電鍍保護邊、電鍍車門把手，即時覺得型咗兼潮咗！車尾睇落仲有啲似HondaJazz㖭，總之唔講嘅話，仲會以為係一部日本七人車！

■新一代Carens整體外形，都較上一代出色。

■上一代外形雖不至於核突，但年輕人未必睇得上眼！

■車身多咗電鍍邊，即時型仔晒！

■最新CVVT技術，可減耗油量、提升動力輸出兼減少污染排放。

價錢贏晒　七人車至抵之選

以前好多人都以為七人車係藝人專用車，事關可以喺開工嗰陣換衫休息兼打躉，好多緋聞咪就係話男女藝人喺部七人車談完心之後俾人見到而傳出嚟之嘛；其實撇除七人車作為藝人保母車嘅標籤後，大家會發現七人車實在係一部非常實用嘅車，事關載人載貨都多過人，內櫳普遍闊落、座位好多都可以摺起騰出多啲空位用嚟擺放雜物；而且七人車零舍多暗格同儲物位，講實用就非佢莫屬，但車價起碼都要十多二十萬。想用十多萬買部有齊啱啱講嘅設備，恐怕就只有KiaCarens做得到！15萬9買到一部七人MPV，好多同事聽到都第一時間話抵，不過有註腳，就係話以同級七人車嚟講，Carens嘅價錢差不多係最平啦！

■變得現代化的中控台設計，比以前靚得多之餘也見設備齊全。

■舊嘅中控台起晒角，好似個盾牌咁！

■車廂鋪排同軚盤，整體都比上一代「靚仔」！

■搞鬼電動油箱掣（紅圈內），㩒個掣油缸自動開門，好方便！

全新概念MPsuV

小妹自問對車認識有限，都係邊做邊學，但就知道所謂MPV同SUV係乜東東，之但係MPsuV就真係第一次聽。MPV即係Multi-purposeVehicle多功能休閒車，而SUV即SportsUtilityVehicle運動型休閒車。新一代Carens就係以MPV為基礎，並結合佢嘅優點，加上SUV嘅風格同性能而成，聽落好似幾複雜兼搞鬼，其實簡單啲嚟講咪就係有MPV嘅舒適實用功能，兼有SUV運動外形同操控性囉！

■平放中後座之後，幾個人一齊攤唞都得。

內櫳寬敞打觔斗都得

除咗外形Smart咗之外，內櫳亦下過功夫，上一代Carens中控台以至內櫳Design同手工都係中規中矩，尤其係中控台，同車身外形一樣咁笨，四四方方兼起角。
新一代就唔同晒，中控台多咗唔同線條，望落都潮番啲，內櫳Design靚咗兼細緻咗，而且波箱設有加減波，興致到咪可以轉波感受吓揸手波車嘅樂趣囉！中後座都可以隨意變動，而空間仲要比上一代大，小朋友想打觔斗都仲得！我就話最好用嚟做Shopping戰車，事關我幾姊妹都好鍾意Shopping，次次掃貨之後，部車都唔知載人定載貨好，家下咪唔使煩，人同戰利品都可以一次過車返屋企，再加多兩個百厭姨甥都仲得！