聽日就係端午節，包好糭未？係喎，出街買糭咁方便，使乜包得咁辛苦啫！而且又有咁多選擇，可以慢慢揀啱先買。雖然今年豬肉價貴咗，不過糭價都冇乜點加，仲主力鬥豪鬥健康鬥新奇特別。想知邊隻糭好食？睇吓我哋嘅試食兵團畀嘅意見嚟做參考啦！
記者：梁學文 攝影：陳盛臣
30人試食兵團
我哋喺街頭搵咗30人試食，試吓今年市面上的糭。結果8成人都話翠亨邨的XO醬姬松茸糭外形怪、材料配搭又怪、辣糭又係怪，總之怪但係好好味。相反，傳統嘅糭就冇乜人吼，話唔夠特別。原來，糭樣越特別，味道配搭越古怪先至越吸引。
第1位
XO醬姬松茸糭$58（a）
賣相：醜醜醜醜醜（5個醜爆燈）
味道：味味味味味（5個味爆燈）
雲南野生姬松茸配紅豆再加XO醬，味道都夠「特別」。放入口，嘩！好嗆喉，一陣辛辣味湧上，原來係XO醬夠辣，再咬，紅豆的味道又中和了辣味，味道唔錯，難怪咁多人都揀呢款，成為今年的糭王。
第２位
五彩素糭王$37（b）
賣相：醜醜醜
味道：味味味味
淨見個糭樣都覺唔係好開胃，好多試食兵團都話唔吸引，不過點都要硬住頭皮試食，結果令人有驚喜！紅豆同紅棗等素材料，口感唔錯，蒸過後有點起沙，消除糯米的膩滯感覺。
第３位
蜜餞八彩糭$46（c）
賣相：醜醜
味道：味味味味
呢款甜糭可以打入三甲，全憑入面有芒果亁、圓肉同菠蘿亁等8種亁果，七彩色雖有點影響食慾，不過味道一流。糖冬瓜和紅棗令糭帶甜味，甜中又帶𡁻頭。
第４位
石頭魚竹筒糭$45（b）
賣相：醜
味道：味味味
石頭魚好好味，加上竹筒外形夠特別，唔同一般包糭方式，賣相都夠靚，可惜只限於用來裝飾，糭完全冇竹筒味。用石頭魚做糭餡，味道夠鮮，但放涼了有點腥，記住要趁熱食。
（a）翠亨邨（23762882）
地址：尖沙嘴美麗華商場地下
（b）鴻星（26280886）
地址：銅鑼灣時代廣場食通天10樓1005室
（c）帝京軒（26226161）
地址：旺角太子道西193號帝京酒店3樓
睇形知出處
囗的歷史悠久，裏面唔係用肉就係用豆，不過喺唔同地方就有唔同嘅外形，好似喺上海就係四角形，廣東嘅就係五角形。最多花樣嘅係香港，因為乜形都有，有啲仲用竹筒包住，夠晒保護。
