唔好話我悠穎馳歧視女性,講到尾,女人揸車嘅觸覺始終唔及男人。話說我有個喺外國讀書嘅表妹,早排就同我講咗單蝦碌嘢,聽到都替佢揑一把汗。
外國唔少Highway夜晚都係伸手不見五指,即使有路燈都相當昏暗,唔似得香港嘅道路咁燈光火猛。有時視線只可及頭燈光線所到之處。表妹佢手車本來已經係不敢恭維,加上初到外國人生路不熟,佢話一要夜晚開車就精神緊張。上星期某晚,佢又戰戰兢兢咁揸車上Highway,因為呢條路已經唔係第一次揸,經驗話佢知要連Cut幾條線。
點知當佢扭軚切入第三線時,出現眼前嘅竟係一條石墩,嚇得佢即時回軚,好彩當時車唔算多,佢仲懶醒咁話第二朝行經同一地方,發現石墩上布滿胎痕,證明同佢一樣嘅失魂魚多的是。計我話,好似表妹呢類低技術駕車人士,一套針對黑夜行車嘅夜視裝置真係唔少得,𠵱家市場上嘅夜視裝置,主要透過紅外線及攝錄鏡頭,用以監察前方有否障礙物。當然,呢類裝置喺香港根本無用武之地。
悠穎馳
豪邁不羈,愛車如命,聽幾下引擎聲就知咩車!