上星期日講開喺東京到新宿住友大廈五十二樓瀨里奈食火鍋，珠寶Ｌ與賓架黎睇完一齊喝左丁山倒采，佢兩位都話去瀨里奈要去六本木本店，分店已經差半皮。下次一定要去六本木嗰間至得。珠寶Ｌ話瀨里奈曾在紐約「中城」（midtown）近希爾頓酒店開過一間，價錢比東京平一半，但仍然太高級。佢舊年去紐約，想話搵瀨里奈，先知道間餐廳因為生意唔好，已經停業。
一位馬圈老友又打電話嚟：「你今年先至去睇安田紀念大賽，冇運咯。舊年我哋去，一隻『牛精福星』已經贏到開巷，加埋搭『勝利飛駒』一條位置Ｑ，直情所有飛機票、酒店、食大餐嘅費用都返晒嚟。『牛精福星』馬主王永強為人疏爽，嗰晚請晒香港打氣團團友、記者、工作人員加加埋埋近五十人食晚飯，就係到新宿瀨里奈，開埋紅酒，食神戶牛肉，好似埋單找數要三百萬日圓以上。跟住王老闆又請去東京福臨門食鮑魚㖭！」
冇計啦，舊年「牛精福星」贏安田大賽，頭馬獎金一億日圓，加上曾經攞埋香港一哩賽冠軍，多得額外獎金一百萬美元，王老闆請食飯，點用得晒呀，用小部份已經令各界老友歡天喜地。有啲馬主好闊佬嘅，好似「馬友利」、「馬友寶」馬主吳守基發動馬主贏馬捐錢支持二○○八年度奧運馬術賽，大馬主施羅夫先生隻「飛馬王子」贏咗，立即捐五十萬，「好爸爸」馬主袁仕傑今季贏到笑，捐七十萬，王永強亦捐咗唔少，學《蘋果》馬經版話齋，好心有好報，吳守基同一班肯捐錢嘅馬主，今季全部拉頭馬。上星期三《蘋果》話「雙妙星」馬主葉克勇捐一億元畀中文大學，好心之人也，果然當晚就贏，可惜佢人在羅省，冇在場一償拉頭馬之心願。佢已經幾年未贏過頭馬嘅嘞。
一講東京覓食，立即收到唔少回響，可見好多朋友係東京常客，鍾意去日本玩。我哋去日本，點解去完又去，全不厭倦嘅呢？日本之吸引力在其禮貌，效率高，亁淨衞生，街道安全，加上日本人嚴格注重品質，絕不欺場，其他亞洲國家，超英容易，追上日本就好難。