以前做保母無咩要求，最緊要生過仔，有湊仔經驗就得。今時今日咁嘅服務態度梗係唔掂啦，起碼都要上番個Course，上堂筆記仲要成2吋厚；跟心理學家、中醫、社工、營養師學心理輔導、生理調節、啓發思維等技巧。對住啲細路唔止𠱁，仲要識諗計，真係慘過做Sales。
記者：林佩婷
攝影：林栢鈞
過五關斬六將
負責的計劃統籌主任Rainbow話：「我哋成個計劃由衞生福利及食物局『社區投資共享基金』贊助。由於上課教材多樣化，所以一定要嚴謹挑選。如上一期有140人登記，最後只取錄14人，由05年到𠵱家，只推行咗四期，畢業的只有60幾人。我哋培訓出來的不是一般保母，而是多元智能保母，除咗照顧小朋友飲食，還要培養他們的身體及腦部發展，如用音樂、玩具、圖書啓發思考。」
傳統湊法不合時
傳統保母見細路喊就畀粒糖，但多元智能保母就會研究佢因咩事喊，再對症下藥，聽落好似好厲害！Rainbow隨口舉幾個例：「曾有BB三個月大，保母教識佢講單音Hi，𠱁到阿媽好開心。又好似有保母幫BB做運動時發現佢手指公屈曲，後來醫生話好彩發現得早，即做物理治療，否則手尾長。」
基本要求：初中學歷、育有子女、30至55歲
報名程序：第一輪篩選：電話登記（淘汰率百分之五十）
第二輪篩選：筆試：性格及IQ測試、危機處理（淘汰率百分之五十）
第三輪篩選：面試：由臨床心理學家及社工負責，測試應考者對小朋友的熱誠及危機處理。（淘汰率百分之五十）
課堂學習：為期一個月，逢星期一至六，朝九晚五，包括幼兒起居照顧、多元智能訓練、營養健康。最後考試及格才能執業。
全能型
Mandy做咗全職主婦12年，個女大晒，日日喺屋企無嘢做。偶然從報紙睇到多元智能保母招募，即膽粗粗參加：「我面試見咗2次，一直對自己好有信心。上堂要學語文、數學、人際、音樂，最重要係學識點令小朋友發揮潛能。我覺得最難就係學音樂智能，初初未能分到前後中腦，搞到我個腦都亂晒，但之後就得心應手。修畢課程後我覺得自己最拿手就是觀察小朋友，看他們最擅長哪一方面，再加以訓練。好似之前教個BB按唔同形狀放好積木，最初個BB完全唔知做緊咩，但經過3個月的不斷重複訓練，終於成功令佢放啱積木位置。」
姓名：Mandy（第二期學生）
學歷：高中
子女：2個女
專長：觀察小朋友
經驗：3個小朋友
諗計型
咁多位保母中，Edith最好笑容，以為佢做保母只為賺份人工，誰知她因親身經歷想幫助其他小朋友：「我個細女有讀寫障礙，所以我上過不同課程，希望幫到個女。在學習過程中，我發現自己腦筋都算轉得快，讀書同湊細路都應該難我唔倒，所以希望運用學過的經驗幫到其他人。
善用讚美
Edith認為無論小朋友幾大，都需要讚美。好似她最近照顧的雙胞胎姐妹，妹妹經常扭計，Edith就教佢講「好呀」：「有時問妹妹刷唔刷牙，佢就答『好牙』；當佢唔去刷牙嗰陣，我就會話佢頭先話好，所以要做，妹妹通常就會照做。又好似妹妹食飯中途成日企起身，我就會扮嬲叫佢Sit，效果都好好。講到開心佢仲即場教路：「小朋友經常搗蛋，想佢哋乖，就要善用讚美。」
姓名：Edith（第三期學生）
學歷：初中
子女：1仔1女
專長：糾正小朋友壞習慣
經驗：3個小朋友
知識型
同咁多位保母傾偈，發現Amy以前做過幼稚園教師，學歷有一定水平。雖然唔係話歧視保母行業，但跟以前相比，似乎有點失色。誰知Amy毫不介意，還說做保母沒工作壓力：「生咗仔仔之後，偶然都有幫小朋友補習或做助教，但我發現做這些工作有一定壓力。做保母就唔同，我有權選擇小朋友來照顧。由於以前做過老師，所以對教3至4歲小朋友最有信心。」
教用鉸剪鬧出笑話
Amy教路幾歲大的細路好奇心超大，她都曾經鬧過笑話：「記得有次湊個4歲同BB，咁啱我用鉸剪幫BB剪棉花，家姐又話想剪。徵得家長同意後就俾佢試，點知佢竟然將件衫同褲剪出一個個窿，仲好開心對住我笑，真係俾佢笑死。」
姓名：Amy（第二期學生）
學歷：教育文憑
子女：2個仔
專長：教育3至4歲的各科學習、行為情緒
經驗：3個小朋友
家長：想個細路學多啲
家陣小朋友好矜貴，除咗有工人服侍，父母亦不惜一擲千金請多元智能保母。問到他們聘請的原因，一句講晒就係想小朋友學多啲。
個案1：滿足要求多多的媽咪
朱太最初只搵個陪月待產，後來想找一個最少有兩三年經驗、有常識的保母。於是透過陪月找到多元智能保母：「我最初以為佢只識拎兩張碟播歌俾小朋友聽。原來保母除咗照顧飲食外，仲會設計閃卡教泳橋認顏色。就連我的心理狀況也照顧周到。泳橋從2個月大就由保母湊，朝十晚六，已經7個月。我覺得個女情緒好穩定，無其他小朋友咁情緒化。」
個案2：幫過輕小朋友增磅
由今年4月開始，Amy擔任2歲安晴的保母。劉太指未請Amy之前，安晴就有過輕及內向的情況：「當時我請外傭，主要講外語，溝通有問題之餘，煮嘅又唔啱食。令安晴比同齡的小朋友輕、發育遲、又矮，連行路都慢過人。於是Amy每餐煮不同的食物畀安晴，好似魚湯、南瓜茄子通粉等。又帶佢去公園玩，等佢同其他小朋友接觸，從而訓練膽量。𠵱家安晴唔單止足磅，仲會主動食飯，閒時最鍾意去公園玩。」
何謂多元智能
智能保母除要學幼兒起居照顧及營養健康外，最重要是多元智能訓練。當中包括邏輯數學、語言、人際、內省、音樂、動覺、大自然辨識及空間智能八大方面。
保母薪酬
以前保母可能一個月只得幾千元，做到多元智能保母，負責照顧0至6歲幼兒，每周最多做六日，每日不超過8小時。唔止唔使幫手做家務，收入還不錯：
半年一期課程
雖然市場對多元智能保母需求量開始增加，但舉辦機構基於貴精不貴多的道理，堅持每半年一班。
舉辦機構：循道衞理觀塘社會服務處
學費：$480
查詢： http://women.labouraid.org