廸臣（262）有名牌基金揸重貨，港股又快半年結，有WindowDressing效應，廸臣有得諗。港交所（388）權益網資料，名牌基金Penta揸咗廸臣1.32億股或23.09%，當中，或者包埋可換股票據（CN）潛在行使股數3500萬股。要咁睇，就算扣埋CN股數，Penta喺廸臣嘅持貨量，都高達9726萬股或17%，咁嘅比重，喺一隻細價股當中，唔係嘢少，基金有煲重廸臣勢頭。
又廸臣總市值不過3億銀，呢期股仔炒到喪，一隻股仔單日成交額10億、8億，都係碎料，港股又快半年結，要辣起廸臣，容乜易？再講，廸臣上年尾話，有意投資開封銀行，呢期祖國銀行股炒落後，隻隻有勢，若然開封Bank消息有着落，唔信廸臣唔癲。廸臣連今年配股之後，最新NAV0.712元，家陣仲有20%折讓墊底，當炒折讓，以P/B1倍做目標，短炒博升25%，都有魚有肉。
漢國大把水位
上年年尾到家陣，大部份二三線都百花齊放，漢國（160）喺呢段期間，就逆市而行，炒落後，漢國已經有睇頭。又漢國最新NAV5.2元，現價（3.53元）相對折讓32%，有NAV墊底。計埋集團喺祖國上千萬方呎土儲，漢國起碼增值兩蚊，NAV上到7.3元，折讓51%。以折讓40%做目標，漢國要升24%到4.38元，漢國若然有調整，昅實上升軌3.3元撈底，值博率仲高。
錢雋