昨日港股喺中資銀行同保險股帶動之下，一舉升破21000關，833億成交，絕對唔係小嘢，雖然恒指企喺保歷加通道頂收市，咁大成交咁嘅升勢，下禮拜頭冇理由唔睇好。
俊樺昨日叫大家昅實啲「六行三保」，個勢對辦就要飛身買貨，擺番個止蝕位就得嘞，如果大家已經追咗貨，就恭喜晒，下禮拜個市升，睇嚟都係呢啲股份帶動，如果個市整固，呢啲股票應該都唔會回，因為耷咗咁耐，炒上嚟都係想食大茶飯。
如果大家飛身嘅動作慢咗，未買貨，唔緊要，因為既然上升空間可以好大，下禮拜一開市捕定個靚位買貨都未遲，致勝嘅關鍵係揀啱當炒股，當然，炒輪就要再花啲工夫揀，因為花多眼亂，隨時會揀到啲唔升或者升得少嘅窩輪。
昨日窩輪成交唔失禮，157億，增加1/3，呢個成交好耐都未見過，當然「六行三保」有C輪嘅都識郁，下禮拜炒輪，「六行三保」嘅輪係優先選擇，當中有兩個策略，一個就係買本身又係恒指成份股嘅股票啲C輪，另一個就係揀一向炒得最狼嘅股票，唔使講大家都知，郁得快嘅就係招行（3968）。
招行C輪9565：招行昨收22.15元，升3.5巴仙，成交大咗好多，早排介紹佢啲輪嘅時候有啲保守，因為其他銀行股走勢只係一般，今次六行齊齊炒，招行上試25元應該冇乜走雞，可以買啲招行C輪9565，昨收27仙，槓桿率8.2倍（有效5.4倍），正股升上25元，9565應該喺48仙樓上，正股跌穿21元止蝕。