父親節最好禮物係乜？普洱茶餅。飲得又「揸得」，最啱阿爸喇。國內最近興起炒普洱熱潮，令茶葉價格飆升三倍，加上近月雲南普洱市大地震，茶產量減少，令茶價進一步上升。據茶莊負責人表示，現時最有升值力係2000年份「紅印」，每年升20%。唔信？50年的陳年普洱茶餅原價$50，今日身價$120,000，一啖茶$100。
記者：區佩嫦
攝影：林麖鈞
鳴謝：顏奇香茶莊（25441375）
必送2000年雲南瑞榮「紅印」
當時價：$100/餅
現時價：$500/餅
升值力：每年20％
2000年推出的「紅印」，由雲南瑞榮茶廠生產，仿照50年代紅印的包裝，可以說是紅印復刻版，味道醇和順滑。
現存最貴價茶餅
雲生祥茶濃味甘
1950年價：約$50/餅
現時價：$120,000/餅
一啖茶約值：$100
30年代的雲生祥，屬於戰前老茶，產自倚邦茶廠，雖然不及宋聘號、吉昌號等頂級茶莊般有名，若以老茶嚟計，勝在「抵飲」，此茶茶氣濃，入口甘醇。
江城號越飲越香
1950年價：約$50/餅
現時價：$120,000/餅
一啖茶約值：$100
30年代江城號同樣屬於戰前的老茶，其陳化期夠，倉味夠濃，口感醇厚豐富，越飲越香。
最矜貴$200,000古董茶
宋聘號可遇不可求
講最值錢的當然是戰前的陳年普洱茶，這些茶被視為古董茶，由於當時的茶以茶莊來劃分，所以又叫號級茶。部份號級更只會於拍賣會出現，可謂有錢都未必買到，一般茶莊所賣的老茶餅約為10萬。呢款宋聘號係不少茶莊的珍藏，收藏家分分鐘出到$200,000先會心動。
最好升紅印$15變$80,000
當時價：$15/餅
現時價：$80,000/餅
一啖茶約值：$66.7
紅印屬於中國解放後的茶，約產於1950至1955年，由於包裝上印有紅色的茶字，故名為「紅印」。這段時期的茶葉屬青餅，經50多年的陳化，茶氣最盛，甘醇味適中，顏先生認為現時的「紅印」最好飲。
普洱問與答
問：雲南邊個產區的普洱茶最值得收藏？
答：想買嚟保值不妨考慮雲南六大茶山出產的正山茶，六大茶山包括倚邦、蠻磚、莽枝、革登、曼撒及攸樂。
問：普洱點保存？
答：普洱不能放入廚房及櫃內，存放時毋須開抽濕機幫茶葉「抽水」，只需放於空氣流通的地方，如組合櫃頂等，讓茶葉感受四季的季候轉變，陳化效果會更佳。
問：點樣睇茶餅的優劣？
答：靚的茶餅一般顏色夠深兼均勻，濕咗嘅茶餅顏色較為混濁，布滿灰白點，貌似發霉，行內人稱為「濕倉」。
普洱唔老利？
雲南普洱市發生大地震，為何該市鎮以普洱茶為名呢？普洱市原叫思茅市，因該地盛產普洱而經國務院批准於4月8日更名，改名不足兩個月便發生大地震，難道此名「唔老利」？