80年代，張國強（KK）做過第一代《430穿梭機》主持，二十幾年前波牛形象已深入人心，今時今日仲上RoadShow同出DVD教人踢足球！KK揚言重出江湖，4月更首度監製電影《擊情歲月》，總之搞作多多。回想83年擔正電影《波牛》（資深戲迷指《少林足球》深受其影響），戲內雙腳夾波扭過後衞同龍門，天馬行空得緊要。踢波可以融入打功夫，當然可以應用埋喺揸車上，「咁多年我都係鍾情Jeep車款，貪佢長氣好力水，最緊要係操控反應快，扭彎得心應手，好似帶波衝鋒陷陣一樣咁威猛！」
文：許一楓
攝影：陳陶鈞
揀車都要Young
KK健康大哥哥形象深入人心，離開無綫移居海外，間唔中返香港曝吓光，以為佢想慢慢退出娛樂圈，從此專心做一仔兩女嘅好爸爸，點知今次見面，佢竟然話要再戰江湖，工作編排得密密麻麻，跑馬拉松、拍電影、做電影監製，都係為咗要證明自己嘅魄力，所以對HondaCR-V特別有Feel。原來KK認為CR-V有氣有力兼夠Young！「Honda呢架CR-V屬Sporty、另類同後生嘅車種，啱晒我呢種追上時代嘅人，我仲好Fit㗎，唔好以為我係阿伯Out晒呀！」
對Jeep情不變
KK話鍾意HondaCR-V同佢一樣咁有魄力同毅力，原來佢對Jeep有情意結，「我鍾情Jeep都有十幾年喇，記得以前喺加拿大住嘅時候，都係揸開Jeep，就算返咗香港，都係覺得Jeep最好，鍾愛程度從無間斷過，加上我屋企有老有嫩，Jeep大大架，車身又高，空間又多，老人家同細路仔上落都方便啲！」
KK熱愛運動，足球、Golf、籃球、羽毛球、壁球、游水，幾乎講得出嘅都識，有架Jeep就可以將所有運動用具放晒喺車尾箱。就算閒時陪老婆到超市入貨，一大袋日用品Jeep個尾箱都啃得落，「我哋一家五口，經常揸車出入，食飯、運動、行街都會揸車，車對我哋一家人嚟講真係幾重要㗎！」運動同揸車有咩關係呢？「我經常會將單車放喺車尾箱，有時去到某個地方會泊低架車，然後跑步、踢波囉！」果然名副其實車出車入。
不再滿肚怨言
第一眼望到KK跳咗上架CR-V度，身手相當敏捷，偷偷望吓佢個肚腩，果然Fit到無半點脂肪，「Keep好個身體，可以迎接唔同嘅工作，而且可以同啲仔女一齊做運動，關係可以Close啲嘛！」
見佢以扭波比喻扭軚過彎，梗要實地試吓佢手車穩唔穩陣，不過揸揸吓KK突然好感觸咁話：「其實揸車真係好似人生咁，有人揸車會發呆唔開車，有人會撞車有意外，甚至死亡，揸車嘅好壞，其實好睇你自己點樣控制佢，以前我揸車好𤷪𤺧，成日怪人點解揸車揸到咁渣，好多怨言，從來無先諗吓自己有無問題，結果令自己唔開心之餘，又得罪人。𠵱家揸車最緊要做好本份，首要安全駕駛同順暢，一切都取決於你嘅判斷力、揸車技巧同準備功夫，所以今日我都係唔會揸得快㗎喇！」
揸車唔夠老婆叻
雖然，KK比太太揸車經驗多，不過KK謙虛咁話自己無太太揸得咁好，「揸車同做人一樣，講到做人，我老婆當然勝我一籌啦，不過呢幾年我都開始轉變，學識唔好事事埋怨，嘗試欣賞身邊人，懂得先付出，咁樣揸車同做人先會更輕鬆更安全，自己同身邊人都會開心啲！」
KK好贊成譚詠麟掛在口邊嘅「性格決定一切」，就算有人搵KK拍戲，當年機關算盡嘅KK，總會有藉口推卻別人，封閉自己，成個人變得懶散起嚟，原來一切嘅源頭都係因為怕輸、怕瘀嘅心魔。幾年前，開始篤信佛學，KK從佛經中參悟出不少佛理，「佛經教人無所求，呢樣好重要，唔好處處計較得失，真心享受同參與過程先最重要。」咦，佛偈又可唔可以融入揸車哲學呢？
CR-V加皮椅玩豪
在90年代登場的HondaCR-V，一直憑着SUV的鮮明形象吸引到不少車迷垂青，而紅極一時的宣萱和馬德鐘，也曾是首代CR-V的車主。
至於在KK身旁的一部，卻是最新的第三代型號，賣相及車廂鋪排偏向年輕化及闊落實用外，機械配搭也得到改良；廠方特別為新一代型號，配備注入了i-VTEC技術的2.4公升直4引擎，馬力輸出達170匹，更配合一套5前速半自動波箱，起步加速反應更見敏捷。此外，這部由水貨車行引入的新一代CR-V，更改換上跟賓利跑車相近的真皮座椅，令觀感跟乘坐感也要比以前好得多。
HondaCR-V 規格
引擎：2,354c.c.直4DOHC配i-VTEC
馬力：170ps/5,800rpm
扭力：22.4kgm/4,200rpm
傳動：5前速半自動波，前輪驅動
售價：$259,000
車輛提供：富利堡汽車（28776700）
