「環球暖化」係全球議題，前美國副總統戈爾因為攝製咗一套紀錄片AnInconvenientTruth，周圍宣傳，到處演講，大大推動了全世界人民，特別係知識階層，中產階級對氣候轉變嘅認識與注意。今日嘅時髦人物無不開口環保，閉口「碳中性」（carbonneutral），呢分鐘講「減排」，下一分鐘就講「有機種植」。上星期左丁山到紅館聽杜麗莎、林子祥演唱會，到咗中途，林子祥介紹盧冠廷出場講氣候轉變，講咗成十分鐘。盧冠廷唱歌冇得彈，彈結他係一流高手，講暖化之禍害講到七情上面，令人動容。
臨離開舞台時，盧冠廷對大家講：「唔開冷氣，更多謝！」左丁山不禁笑起嚟，因為成個紅館坐滿人，冇窗，如果紅館唔開冷氣，搵乜嘢人坐響度聽歌聽足三小時呀，所有歌星都唔駛搵食！冷氣係唔應該開得太凍嘅，但冷氣機開到二十五點五度，令環保專家廖秀冬滿意，好杰㗎，大家唔駛上到廖局長辦公室開會（好多工程界人士視為畏途，因為內裡太熱也），只係到東京啲百貨公司行半小時，或到任何本港地鐵站行十幾分鐘，包保滿頭大汗，心跳加速。
六月十四日《金融時報》發表咗一篇捷克總統VaclavKlaus嘅文章，咦，居然係反潮流，反「暖化人士」喎！呢位總統今年六十六歲，係經濟學家，竟然聲稱，身為捷克人，活在共產主義統治下多年，現在覺得對人類民主、自由嘅最大威脅，已經唔係共產主義，而係環保主義。環保主義席捲歐美，最近G8國家開會，議題環繞氣候轉變與減排。呢位捷克總統話有理性，熱愛自由嘅人士不能不指出氣候轉變係地球幾百萬年來嘅常規，如果各國政府一致行動，強行推出環保遵守嘅減排規矩指導人類行為，係對人類自由嘅最大踐踏，人類的理性（rationality）與科技進步，會有辦法解決暖化問題，𠵱家唔好自己嚇自己！捷克總統之言，相信會引來環保主義分子大力抨擊，話佢與布殊係一丘之貉。好少政治領袖膽敢如此坦率嘅，捷克人係唔係有啲與別不同呢？