香港人為口奔馳，平日食餐飯三扒兩撥塞落肚就要開工，太興燒味舉行嘅「大胃王」比賽，參賽者實力越嚟越勁，噚日30個參賽者分六組進行初賽，每人一碗叉燒飯，裏面有五嚿叉燒，連飯重九両半，同平時買嘅飯盒份量差唔多。
策略：先飯後叉燒
一般人扒飯，參加比賽就人人「倒」飯入口，阿媽話搵水撈飯食唔健康，呢班準大胃王話之你，好多人都以水撈飯，唔咬唔𡁻連飯帶水一嘢「啪」晒入口吞落肚。有人食飯鍾意「先苦後甜」，即係食晒白飯先慢慢食餸，有啲人就調轉，參賽者多數食飯先，最後先食幾嚿叉燒，「啲叉燒又大嚿又難咬，最尾衝刺時先食。」
呢招先飯後餸似乎真係致勝妙法，初賽以首名出線嘅趙壽生，就係咁樣食法，用咗24秒63就KO咗碗叉燒飯，第二名嘅蘇梓榮輸唔夠1秒。唔好以為大胃王咁食得梗係肥仔肥妹，相反好多參賽者身形瀟湘，有人話比賽前兩個星期就開始練習，有人就話打「天才波」，兩種人臨場表現似乎差唔多，可能食嘢都講天份。
出線者7月2日參加決賽，衞冕冠軍嘅大胃王JohnnyWu直入決賽，噚日到場觀戰，佢同八方講，見參賽者氣勢咁強，擔心寶座受威脅，有啲壓力咁話喎。