養和外科名醫郭寶賢，加盟中環仁德醫務中心，噚日正式掛牌。郭醫生係首批俾私院挖角嘅大國手，傳聞當年「轉會費」高達七位數，震撼醫學界。郭醫生同另一外科名醫陳志偉多年來喺養和並駕齊驅，有指兩人喺內鏡同微創手術方面無分軒輊，郭醫生𠵱家終於獨領風騷，同仁德霍文遜等名醫聯手，隨時食埋濠江條水。
郭醫生離開養和，八方聽聞中大外科學系教授蕭永泰可能跳槽養和。蕭永泰係李國章愛徒，喺中大做研究，有人話佢可能想做更有挑戰性工作，重投私院唔出奇，當然養和銀彈攻勢都係主因。蕭醫生太太羅嘉寶係仁安醫院仁安乳房保健及治療中心主任，兩夫婦會各自搵食定夫唱婦隨，好多醫學界人士關心。