美國5月份多咗15.7萬個職位，超過市場估計嘅13.2萬個，失業率就維持喺5年嚟最低水平。單睇數據，美國嘅就業市道似乎唔錯，但係一班年過40嘅美國人就慨歎搵工難過登天。
喺MSNBC討論區，一睇個名就知佢47歲嘅網友FrustrationatAge47話：「𠵱家做緊『量地官』，喺3個搵工網站同埋幾份報紙不停搵工，雖然有幾間公司叫我面試，但最後都係一場歡喜一場空。有間公司話我資歷太高，有啲就話我唔夠資格。我估真正原因係年齡，但間公司驚俾人告，唔敢講到明。」
解讀廣告睇暗示
另一位同病相憐嘅AgeDiscriminationintheworkforce指出，「大企業、政府以至職業介紹所都對40歲以上嘅求職者敬而遠之。」佢話當你喺招聘廣告見到「有活力」（energetic）呢類字眼，即暗示間公司唔請年過40歲人士。
美國勞工部個網頁，只列出20歲以上男女，5月份失業率分別為4%和3.8%，但無細分40歲以上人士嘅就業情況。反而提及15至19歲青少年嘅失業率原來都幾高，達15.7%。