香港都有武林大會？冇錯，不單止有，而且有六大派，仲年年舉行，今年已經踏入第29年嘞。八方講緊嘅，係噚日朝喺灣仔金紫荊廣場舉行嘅「香港六宗教領袖座談會」，與會嘅包括佛教覺光法師、道教湯偉奇、孔教湯恩佳、回教脫志賢、基督教蘇以葆主教，同埋以敢言見稱嘅天主教香港教區主教陳日君樞機。
六大派「掌門」祝禱
六大派「掌門」噚日輪流用唔同教派方式為香港回歸10年祝禱，有啲虔誠上疏、有啲閉目合十誦經、有啲唱詩歌，但令人印象最深刻嘅，非陳樞機呢句莫屬：「祝願行政長官、政府官員，同全港市民都愛國愛港，齊心建造和諧社會，同消除貧富懸殊。」呢句話可圈可點，陳樞機言下之意，係咪認為有啲官員唔夠愛國愛港呢？
「掌門」祝禱後，就將寫上祝願辭嘅紅色心意卡貼喺主禮台背景板上面，八方搵到陳樞機寫嘅心願：「香港圓滿完成政治回歸、文化回歸、宗教回歸。」樞機冇解釋許呢個願嘅原因，佢希望「圓滿」回歸，可見佢認為𠵱家回歸仲差緊啲嘢，香港人心回歸咗未，點解未「圓滿」回歸，大家心知肚明，唔使樞機多講啦。
用腳爭取民主普選
其他信眾許願幾多元化，天下太平、身體健康、家宅平安乜都有，八方發現有啲心意卡寫住「祝願香港自由、民主、高度自治，全民普選2012。」毛澤東當年講過，「自己動手，豐衣足食」，八方都認為行動最實際，既然就到7.1，與其將普選願望寫喺心意卡度求神拜佛望有普選，倒不如「自己用腳，7.1上街」，靠自己向中央、煲呔爭取民主仲實際。
昂坪吊車出事，寶蓮寺住持釋智慧好似仲㷫㷫哋，噚日揸住把紙扇猛「撥」，佢話吊車停駛後，去寶蓮寺參拜嘅善信的確減少咗，但大師話安全至上，吊車毋須急於恢復行駛，正所謂有心唔怕遲，真係想去寶蓮寺嘅，搭巴士都上到山，要入寺嘅，始終都入到佛門，出家人果然睇得好化。往年呢個場合，一定唔少得民政事務局局長何志平，今年卻唔見佢蒲頭，大會話佢公務繁忙，唔得閒嚟。唔係提早收工啩。