本來編輯要我寫一篇背囊友慳錢遊，找了揹背囊遊世界308天的Yvonne說說心得！怎知，這位遊遍超過40個國家的女子竟說：「揹背囊唔代表係慳錢，只係一種旅遊方式！」那麼，自由行遊遍地球，是否要有很周詳的計劃？「無喎，大約知道自己想去邊，覺得夠便返屋企！」旅行本就是隨心所欲的，冇得教人！
記者：梁佩芬 照片由被訪者提供
體驗民生 必去街市超市
新認識的人和講兩句就斷定我是背囊友，不是我表露過甚麼，只是看我手粗腳粗，短髮皮膚黑，就知是揹背囊的骨格；相反，Yvonne卻是四肢幼細，皮膚白 ，只需加對高跟鞋，與高貴斯文OL無異，哪會想到她也是背囊友呢？
「揹背囊只是一種旅遊方式，好多時揹背囊都係為方便，同慳錢無關係！好多人以為『背囊友』去旅行就要死慳死抵，其實係錯！我唔會為慳番幾十蚊，而住全城最平的旅舍，想到衞生、保安問題，就會覺得唔值得，唔好為慳錢而慳錢！所以，我唔會住床位，既唔安全又冇私隱，最鍾意係GuestHouse，一幢十多間房，可以同其他遊客接觸，老闆又平易近人，返房後又有私人空間，其實價錢同住床位差唔多。」想慳錢Yvonne提議到每一個國家都要逛逛街市和超市：「喺街市睇到民風民情，入超市知道當地物價，唔會俾人呃；仲有InternetCafe，可以認識更多Backpacker，找夥伴同路或者問資料。」
無計劃游蕩見步行步
問Yvonne去過哪些國家？她說：「唔好考我啦！」中國、不丹、日本、老撾、緬甸、斯里蘭卡、美加、墨西哥、智利、秘魯、玻利維亞、津巴布韋、馬拉威、肯亞、坦桑尼亞、埃塞俄比亞、埃及、伊朗、大半個歐洲．．．．．．約40個吧！更要讓人羨慕她曾是旅遊記者，一份每個人聽到都大叫「好工」的職業，但做了年半，決定辭職：「我冇資格去介紹地方畀人，每個人睇到嘅都唔同，旅行要落地感受，旅遊版根本不應該存在！」
今天口響響講不用看旅遊書的她十多歲時歐遊，也是靠旅遊書指點迷津：「嗰時好有Plan，Check晒火車班次，定晒每日行程，又限定每日使幾多錢；但旅行又點可依計而行，一跟唔到就煩！」所以以後旅行，開始隨心，最多是定出發及「大約」回程日期，去哪些國家，到了當地再找想去的地方，「一個Trip用幾多錢？我真係唔知，但每日我都會Mark數！總之夠錢就出發，玩到夠便歸家！」
認識自己越危險越堅強
對充滿運動細胞，天天跑步的Yvonne來說，旅行不只是用眼去看，還要踏實領悟才知道世界發生甚麼事。在斯里蘭卡與當地人結隊一齊登上Adam'sPeak，在非洲無事做走到街上跑步，怎知矮幾截的小孩都有摩打腳，快過她幾條街！「世界上有好多有趣事，只要走出來就知道有甚麼可能性！」所以，旅行是用你自己的腳行出來，淨看不去，或者跟別人的方向而行，都不會是「你的旅行」！
Yvonne的旅行經歷，就是從不經意中製造出來：「越Unexpected，就越開心，旅行根本就係Unexpected！」所以，當世人眼中看女仔獨自一人去旅行是好危險，她卻從中認識到自己，學懂分析每件事！旅程中亦會有無助時：「喺津巴布韋，我坐木筏遊河，突然有隻河馬伸個頭上水，木筏翻了，船夫又受傷，我無事，但驚到手騰腳震，那刻才知自己幾冇用，見人流血都唔識點去幫！」雖然，那刻Yvonne顯得無助，但兩人也要在荒蕪情況下逃出生天：「你要知道唔走就一定死，無論幾辛苦都要行！」所以，在最危險的情況下，人人也會變得堅強，但那次恨自己連最基本的止血動作也不懂做，回港後立即報讀急救！旅行，不只是玩，還可以認識自己！
