上周最Top話題「昂坪360纜車50米高空墮下」，睇嚟360要革新自救先有人敢搭。講大風？點都唔夠祖國八達嶺長城，人哋啲纜車咪又係咁行，點解360咁渣斗？我哋搵嚟理工大學盧覺強工程師細數10處360自救同乘客緊急求生。原來360最大問題係外形，食正風，又無「秤砣原理」。
記者：劉昱蘭
攝影：陳盛臣
Models:Vanessa、Mandy（TalentZone）
TOP纜車必改動
TOP1流線型設計唔食風
纜車車廂嘅6角形設計，硬邦邦平面好食風，大風一吹就搖搖擺擺，所以成日都因風大而停駛，今次仲跌埋落街。如果車身改作子彈形，好似啲靚車咁流線型設計，少啲平面，令啲風易散開，咁就唔會咁易令佢搖搖吓，遊客都會放心晒。
TOP2秤砣原理永遠垂直
子彈形車身仲有樣好，就係外形亦似一個秤砣，車身會永遠垂直，就算真係搖，都唔會兩邊擺，穩定好多。
TOP3「先天缺陷」車臂要封口
𠵱家扣住條電纜嘅車臂，形狀好似一個衣架咁，只係勾住條電纜，有空位俾佢走甩咪有機會跌落街，可能因為先天嘅機組設計要咁做，但事實證明一定要封嘴先最穩陣。
TOP4一條橫閂唔保險
車臂同車頂只靠一條橫閂連接，如果個位一斷咗，就冇後備保險，一定出事，加多條垂直嘅鋼纜就保險好多。
TOP5咁快螺絲生銹？做好保養
俾記者影到車外殼啲螺絲生銹，門面嘢都做唔足，仲要死撐話係正常現象，生銹點會係無問題吖？好心就勤力啲做好保養，咪死要面子，如果再係咁嘅態度，360真係無得救㗎喇。
TOP6偷工減料 轆硬度唔夠
近站嘅位置，被發現電纜上面嘅轆已經崩咗，即係材料嘅炭硬度唔夠，材料要堅固啲，先可以畀返遊客再搭嘅信心。
TOP7車底要等同2人重量
360如果有乘客，有重量就唔會擺得太緊要，今次就係因為冇人喺車廂，風大相對地架車又輕，就會出事。所以車底應該都要有相等於2個人嘅重量，每車限坐人數由17人改作15人，咁就任何情況萬無一失。
萬一……唔好彩 乘客自救法
TOP8護頭最重要
整傷手手腳腳都駁得番，撞親個頭就真係無得救，所以任何情況都係護住個頭最緊要。雙手扣實再用手臂夾實個頭，個人縮埋一嚿，咁就可以保住個頭，又保護到胸口重要嘅器官。
TOP9車廂所有人集「中」
車入面有幾多人都好，全部集中喺車廂中間扶穩，原理亦都好似個秤砣咁，重量集中喺中間，車身就唔會咁搖晃。
TOP10背脊落地
如果揀個身體嘅部份硬碰，背脊就相對地冇咁多重要嘅器官，控制到的話就用背脊落地會冇咁傷。
