每次揸車去機場接送親戚朋友，悠穎馳永遠都會將部車泊喺4號停車場，主要貪佢有蓋，愛驅唔會好天曬落雨淋，最緊要係連人都可以舒舒服服咁行過去機場，唔使又上又落；不過，就要付出比1號露天停車場貴$4嘅泊車費，即係每個鐘要$20！
如果呢個月要送親朋戚友機嘅話，不妨將架車泊喺去機場2號客運大樓隔籬嗰個2號停車場，事關機管局搞咗個3小時免費泊車優惠，只要喺2號客運大樓入面嘅翔天廊消費滿$300（最多2張單日消費發票），喺每日上晝10時至夜晚11時，去到位於2號客運大樓5樓嘅換領處換取有關優惠，但要享用呢項優惠，一定要用現金繳付泊車費喎！
講真，翔天廊入面有好多新商店之餘，仲有各式各樣嘅食肆，兼且仲有埋全港獨有嘅4D立體影院，要消費額超過$300有幾難！
悠穎馳
豪邁不羈，愛車如命，聽幾下引擎聲就知咩車！