小保加喺周三南美自由盃決賽首回合，主場3:0擊敗巴甲球會甘美奧，好大機會第6度捧盃。當晚主角除咗看台上一面花白鬍子嘅馬勒當拿同泰維斯外，就係有1個入波2個間接助攻嘅列基美，而今仗將會係佢最後一次喺主場比賽，名副其實係臨別依依喇！
19分鐘列基美開罰球至遠柱，巴勒莫射斜造就柏拉斯奧門前射入；72分鐘，列基美離門25米罰球射穿人牆入網；89分鐘，又係列基美左路過兩名後衞後射波被撲出，輾轉隊友傳中由列廸斯馬頂入成3:0。
唔通要去美職聯？
雖然列基美嘅個人表演，搞到全場球迷熱血沸騰，連帶馬勒當拿亦手舞足蹈；不過，呢位屬於西甲維拉利爾嘅10號仔4個月借用期屆滿，小保加亦講明冇咁多錢繼續借用。所以，列基美打埋下場作客甘美奧後，就要返西班牙報到。
𠵱家最大問題係，維拉利爾唔想要列基美，而暫時雖然傳過國際米蘭想買佢，但係到目前都冇實質進展。我求大俠覺得意甲升班馬拿玻里之神馬勒當拿，大可以打個電話要求呢間前球會買列基美，咁咪一天都光晒囉！
不過講真嗰句，列基美性格太內向，去歐洲浸咗鹹水咁多年，落到場度都仲係頭耷耷，冇霸氣同火氣，返歐洲未必有前途；既然返到美洲就成個生晒，佢同維拉利爾份約又要09年先到期，不妨考慮加盟大搞嘅美職聯球會啦！