愛到原宿血拼潮物，或者去銀座南青山做上等人闊綽掃名牌，次次都荷包大出血，多多錢都不夠用。其實走入FleaMarket，分分鐘執到又平又抵的「中古」二手筍貨，甚至免費貨品，慳錢之餘又可以消磨半天，還可以跟當地人交流一下，這次我們來到新宿的周末市場。
fleamarket執到寶
世界每一個地方，幾乎都有fleamarket，每次旅行，都一定要拜訪一個。惟獨是日本，不是遇着下雨天，就是遇不上周末，一直以來都沒有機會到過。今次，終於有機會到一到，廸偉都是第一次去日本的fleamarket：「我第一次去日本的fleamarket，原來真係好多嘢賣，好有收穫。花費無幾就可以買到隻古董錶，真係好抵！」是的，在日本可以買到好多潮物新貨，不過二手貨品其實都好有價值，到fleamarket兜個圈，分分鐘執到寶。
中古貨品 一樣亁淨
在日本買中古貨，很放心。皆因日本人愛好亁淨，總會把物件清潔整理好，洗亁淨之後才會出售。拿上手，你會感受到那份整潔，衣服買回家洗一趟，就無問題，不會像在國內的二手市場，物品買回家後，無論洗多少次，結果都是有陣味道。無論是二手或者是新貨，日本人對貨物的品質有一定的要求，這是一份對買家以及自己的一份尊重。所以，絕對不會是但求其放貨，但求搵人笨散貨。只要看看收檔後，他們會將賣不掉的貨品包好才棄掉，就知他們對貨品的尊重程度。
講價最重誠意同禮貌
回說fleamarket，位於新宿中央公園水之廣場的fleamarket就是其中一個不可不去的二手市場，主打中古tee、二手唱片同飾物，其他貨品如背囊、牛仔褲等等都有。新宿中央公園水之廣場的fleamarket最大的賣點是平價同賣真貨，貨品的價錢由唔使錢到幾萬日圓都有，為何會有唔使錢？皆因可以講價，或者搭單買。不過請大家決定會買至好議價，切勿像平時去深圳或者泰國掃貨般，以退為進，講價講到一半然後扮走博再減價。在日本，講價都是一種誠意及禮貌的行為，要互相尊重。
買CD喜見
老翻Lennon同Yoko
講到最最抵買的，首推是中古tee，$6.4都有交易。阿芝就掃得最開心，一共用了近$192買貨，掃得最多就是二手tee，她說：「今次最開心係用咗唔係好多錢，都買到好多件衫同CD。好記得有一檔賣CD嘅，我走埋去問搵CD，點知揀揀吓原來隔籬檔賣衫嗰個係賣CD嘅太太，感覺真係好似JohnLennon同Yoko，一個搞音樂，另一個就賣衫。結果我就用咗$19.2，買到CD又買衫，超抵！」無錯，去fleamarket又平又抵，但是次次想返轉頭再搵都會撲空。每次去fleamarket的檔口次次都不同，賣的貨品都有不同，買不買到心頭好，真係要講彩數，不過當中尋寶的過程往往是最令人回味。
阿芝掃貨小貼士
1.唔買唔好講價
如果唔係諗住買，千祈咪講價，因為要互相尊重。
2.留意垃圾桶
每日下晝收檔的時候，檔主會將賣唔去的貨品包好丟去，十足十棄嬰一樣。記得留意四周的垃圾桶，分分鐘執到寶。
3.注意專業收買佬
專業收買佬的檔口，多數咩都有，而且貨品價錢比較貴，好難至可以講到價，想買好貨，不妨幫襯後生仔檔口。
叱咤903《五天精華遊》之「援助交遊」
阿芝和廸偉於3月至5月在網上拍賣家檔，其中一位幸運兒更可免費跟他們遊東京。如果想睇到他們在日本吃喝玩樂之片段，可到my903.com或者留意逢星期一至五，下午2時至4時在叱咤903廣播的《五天精華遊》。
