女生捨得一擲千金買名牌妝物，買齊粉底液、胭脂、眼影等，埋單過千簡直濕濕碎，不過講到買化妝掃，硬係覺得唔值咁貴囉！有人說：「咪又係一撮毛，我屋企支水彩筆同佢差唔多，呢支名牌化妝掃賣幾百蚊，真係肉都赤埋咯！」唔使牙痛咁聲，今次請來星級化妝師Felix，教你執便宜、質優的化妝掃，慳番啲錢買化妝品好過啦！
記者：盧家蕙
攝影：陳陶鈞、楊錦文
Model：Hibernia
Felix醒你揀掃Tips
1.質地：化妝掃主要分人造纖維及動物毛，通常會使用鼬毛、羊毛、貂鼠毛、馬毛，纖維和動物毛軟硬各異，價錢亦有所出入，普遍來說動物毛較貴。
2.觸感：直接試上面珠或手背，如果覺得拮拮地即係太硬身，亦可參考ShuUemura及BobbiBrown等靚掃集中地，親身試靚掃綿軟、細滑的觸感。
3.外觀：觀察化妝掃毛身是否整齊，很多便宜貨一拆袋，就出現飛散或試上手即折斷的恐怖情況。
4.密度：把所有毛掐起來，毛身之間仍存有空位的，即表示密度不足，若毛身稀疏，沾上的粉末就不足夠，塗上臉後便更少了。
洗掃用勞工皂
化妝掃幾時洗？其實冇特定，總之污糟就要洗，通常一星期洗一次就最好。Felix說：「因為化妝掃沾上的不只是化妝品，還有皮膚的死皮、塵埃等，滿佈細菌的化妝掃再掃番上面，係咪好核突先？」係咪一定要買化妝掃專用的清潔劑？他說：「使乜咁貴！化妝掃如果係動物毛，用普通護髮素洗就夠，纖維毛就用勞工皂或洗潔精，尤其是濕漉漉的濕粉掃，用勞工皂最亁淨！記住洗完用廚房用的大紙巾包住掃毛作固定，自然風亁，咪用風筒熱風吹，會吹攣啲毛㗎！」
Felix笑說：「呢幾支掃跟咗我十幾廿年，ShuUemura碎粉掃連個牌子都用甩晒咯！中間的眼影棒已經絕咗版，𠵱家冇出呢隻喇！左手邊呢支係十幾蚊貨仔，我拗彎佢仲方便好用，所以我買化妝掃都唔係一味買貴嘢架！」
平揀靚掃
DoDo姐御用星級化妝師Felix，一聽到小記請他為讀者揀「便宜貨」，不但沒有拒絕，更說：「好呀，貴唔一定好，平嘢都執到靚貨㗎！」到達莎莎化妝品時，他說閒時也會來這裏shopping：「呢度嘅化妝掃唔貴，但有機會執到筍嘢！」即睇Felix的心水平價靚掃，順便聽吓Felix解釋佢地嘅當選原因。
抵搶﹗一套15支的化妝掃套裝$128
Felix說：「呢套化妝掃可以話有齊晒基本要求，毛質亦算OK，喜歡鑽研化妝的人士使用啱晒，比較適合初學者，我都係咁叫啲學生來買呢啲平價貨，用來練習唔需要捱貴貨！」
CROBI雙頭眼影棒$12/6支
一邊是海綿，一邊是掃毛，海綿不會啜住皮膚，很易拖，作為旅行裝或更換舊有的眼影棒就最好不過。Felix說：「好多人會把一支眼影棒玩足幾十隻色，掃完黑色又沾白色眼影，海綿棒越來越污糟，記住，呢邊用開淺色的就永遠掃番淺色，咪做壞手勢。」
SaSa碎粉掃#F02$95
特徵：大而闊的圓球形，毛較長身而極之柔軟。
當選原因：高密度，跟名牌一樣，外形似毛球，圓大而鬆軟，沾碎粉才夠平均，不會沾過量。坊間好些所謂的碎粉掃都不夠圓渾，掃毛不豐滿，跟胭脂掃沒兩樣，唔係波波形咪買﹗
SaSa胭脂掃#F04$85
特徵：中圓拱扇形，適用於顴骨凹凸位。
當選原因：密度夠，沾胭脂粉容易，毛身很軟熟，掃上面冇拮的感覺。
SaSa濕粉掃#F01$85
特徵：濃密扁身配幼細的掃頂，多是纖維質地。
當選原因：輕輕壓於手背，感覺到一定彈力，有海綿的質感，習慣以手指上濕粉的女生，不妨使用濕粉掃，不但會更貼面，避免出現左右面厚薄不均。
SaSa輪廓修飾掃#F03$85
特徵：掃頭平或斜腳，毛身濃密。
當選原因：Felix笑說此掃是香港女仔輪廓不夠深嘅救星，識打陰影，可達致輪廓修飾的神奇功效。
大眼影掃#E06$65
特徵：掃毛短而鬆軟，用於眼窩位置。
當選原因：掃毛夠細密，適合眼窩較闊大的人用。
眼影掃（intense）#E05$55
特徵：掃毛更短、更扁身。
當選原因：毛質很軟，不會硬繃，可用於雙眼皮位置，掃毛密，沾上幼細的眼影會很容易。
眼影掃（Definer）#E02$35
特徵：眼影掃中算是最扁身的一種。
當選原因：毛身很短，軟硬適中，畫眼線不錯，甚至當唇掃也可以﹗
inuoviprofessional眼線筆$88
特徵：小型、幼身而略帶扁平。
當選原因：毛身不軟帶硬，好多人用手指點遮瑕膏，印來印去，用呢款掃掃上就更順滑自然。
CyberColor螺絲掃$38
特徵：螺絲形的刷子。
當選原因：Felix用開的是N年前買嘅幾十蚊貨仔。因為它用途很廣，包括把眉毛梳理整齊、刷走多餘眉粉或睫毛液，必備的﹗
Makeupgood梳刷兩用棒$18
特徵：一邊是纖維做的毛，另一邊則是梳子。
當選原因：不建議以它刷睫毛，易拮到眼，反而用來梳眉毛仲好，有呢款刷就可以唔用螺旋掃。
查詢：28331918