小朋友肥嘟嘟，可愛又得人喜歡，一見就想搣他臉珠，但為父母者，當心孩子過胖，影響身體健康，倘發現子女掛住上網玩game，缺少運動，積聚脂肪，點收科好？早前中大有調查發現，肥胖兒童比14年前高出4成，警號已響，家長是時候睇緊子女飲食餐單，安排子女多做運動，怕球類運動太簡單太無新意？一於跟瑜伽導師學變種瑜伽動物操，家長子女齊減多餘脂肪啦！
記者：郭佩韻
攝影：譚盈傑、何家亮
model：Bobo、茵茵
港孩童缺運動致肥
肥不是一種罪，但過肥會被人用有色眼鏡歧視，歸根究柢，小朋友點解咁易肥？mYoga瑜伽導師MaggieTan認為：「我覺得香港小朋友致肥原因係少做運動，又唔夠體育課，平日食快餐多，又鍾愛公仔麵、零食等高脂食物，食飯又要多汁，全部都係高脂高熱量，又唔肯做運動，梗係會肥啦！家長要以身作則，同仔女一齊做運動，好似我個女咁，佢見我日日做瑜伽，就跟我學，且瑜伽係好多變，用唔同動作，已可變出新招式，好啱親子一齊玩，有助增進彼此溝通。」
變種瑜伽動物操
與小朋友做運動，最緊要係吸引到他們注意力，想得到理想減肥效果，必要持之以恒做下去！家長對子女影響力好大，因為佢哋最鍾意扮做大人，見到父母所做的，佢哋都會照做，家長不妨帶領子女多做運動，mYoga瑜伽導師Maggie建議，一星期做4-5次會出汗運動，每次要20分鐘，以下是由瑜伽變出來的有趣的動物操，家長可與子女一齊學做，一起瘦身！
動物招式瑜伽
第一式 扮老鼠
雙腳跪地，臀部向下壓於小腿上，身體慢慢向前伸，雙手盡量拉前，至感覺到繃緊便可，然後吸氣呼氣5下。
雙腳及臀部保持原位，把身體移向上，雙手手掌互叠拉直，拉緊肩膀及背脊，慢慢吸氣呼氣5下。
第二式 扮貓仔
跪在地上，雙手趴地支撐，舉起臀部，背脊呈拱形，頭向下望。
保持原來姿態，拉緊背脊，用腹力，雙手撐地，並抬頭向上，頭往上下做5下，呼氣上吸氣下。
第三式 狗仔式
雙腳撐實地下，利用雙手的力趴向前，臀部要舉高，與地平線形成一個三角形，保持動作吸氣呼氣5下。
第四式草蜢跳
把整個身體趴在地，收緊臀部，雙腳微微離地平線，雙手往後伸展拉緊，持續拉向後至5下吸氣呼氣。
第五式扮眼鏡蛇
同樣係草蜢跳趴在地下姿態，雙手撐地，手臂及前臂微曲，口中發出「噝噝」聲音扮蛇叫，保持姿態5下吸氣呼氣。
第六式兔仔跳
踎在地上，拉緊臀部肌肉，手掌攤開放在耳邊，穩定位置便往上跳，可跳5至10下。
Bobo練完6式動物操，頻叫好玩，尤其係扮兔仔跳，「做咗幾個動作已經好累，但好好玩，我會記住佢返屋企再練過。」
親子瑜伽操
做運動不但瘦到身，仲可以改善親子關係，靠的是彼此身體接觸，平日除了出街拖手仔，中國傳統父母子女好少抱抱攬攬錫錫，親子瑜伽操可以畀機會大家互相溝動，透過運動，增進彼此感情。
action1：treepose
練平衡
媽媽站在子女後方，子女單腳企並舉高雙手，媽媽就在後面幫助仔女企穩，待5下吸氣呼氣。
action2：碰背練背肌
背對背坐下，媽媽拉長子女舉高的雙手，伸向天，一路吸氣呼氣，然後雙手慢慢往下落，雙手上下落約5-10次。
action3：變種childpose練全身
媽媽趴在地，雙手伸前，背脊保持平直，一路吸氣呼氣。
子女臀部貼向媽媽臀部，把身體攤在媽媽背部，然後慢慢向媽媽頭部位置伸前，約5下吸氣呼氣。
action4：變種widelegtriangle練腳力
坐在地上，攤開雙腳撐住對方，形成兩個三角形，雙手彼此緊握，盡量拉直子女雙手。
維持姿態，彼此推前倒後，可隨意動動身，記得雙腳撐實對方，可做10次，直至累為止。
action5：練腰力
背對背坐下，背保持挺直，左手掂住自己膝蓋，右手伸向後，掂對方膝蓋，然後左右交替雙手，用少少腰力換手。
右手觸住對方右手，左手向高處舉起，盡量用腰力把手壓至腳掌位，左右手交替並重複動作。
