後天將上演今屆「西甲中學」的畢業典禮，「皇馬班」只要順利擊敗馬略卡，便可重奪失落3年的全校班際總冠軍，而外界均認為他們奪冠問題不大；但畢業禮過後，「皇馬班」及「巴塞班」各有主力離校，以下便是將「畢業」的碧咸及朗拿甸奴，在紀念冊記下他們的美好時光。 文：畢傑、牽牛、法比奧
-朗拿甸奴-
美斯仔，你要做班長喇！
巴塞同學仔，今次可能係我最後一次披起紅藍球衣，賽前向各位講聲對唔住；對基達菲時我實在唔應該用「撩陰腿」報復，結果搞到對鄰隔班愛斯賓奴時停賽，就算美斯仔出到絕招「上帝之手」，結果都贏唔到波。
今場係西甲班際比賽最後一周，校董拉樸達都好緊張，出到200萬歐元（約2,000萬港元）重賞，希望馬略卡唔好輸俾皇馬班，我哋先有機會衞冕西甲中學班際冠軍；不過我哋都清楚，皇馬贏唔到波嘅機會真係微乎其微。
巴塞日子好開心
球場係英雄地，記得上年我哋攞到班際同歐洲頂級中學冠軍，大家都讚到我哋天上有地下無；到今個學期我地成績差啲，批評就一個接一個；真係到我哋兩手空空，班主任列卡特肯定首當其衝被炒魷。我呢？都27歲人，假如「意甲中學」出到起獎學金，我都想過去同卡卡做同學。
03年7月我由巴黎轉校嚟到巴塞隆拿，巴塞真係畀咗好多嘢我；無論世界定歐洲最傑出學生，我都攞過晒。美斯仔，如果我走咗，巴塞就要靠你撐住頂上做班長喇。
-碧咸-
去美國搵最後一桶金
終於要行「西甲中學」嘅畢業禮，即係我去美國洛杉磯銀河留學前，最後一次穿起皇馬班嘅球衣。我知道校董卡特朗同班主任卡比路都唔想我走，但係我碧咸牙齒當金使，美國嗰邊出到成億獎學金撬我過去，既然應承咗就無謂轉軚。
今季係我喺皇馬班嘅第4個球季，之前好多傳媒話我冇料到，加盟咁多年都未幫過呢班爭光。好彩我突然喺季尾復蘇，睇嚟周日主場贏埋馬略卡攞走全校冠軍，我呢啖烏氣可以一掃而空，等我安安樂樂畢業。
猛換班主任玩死我
其實，我喺皇馬班呢幾屆，都經歷過好多風風雨雨；好似俾人封為「6條煙」之一，同施丹、費高及朗拿度等歐洲傑出學生齊名，諗落真係幾威。不過呢幾年成日換班主任，搞到我又踢防中、又踢右閘咁，真係俾之前嘅基羅斯同盧森貝高玩死。𠵱家「6條煙」正式散晒班，連我同班最老死嘅卡路士都去土耳其升學，我再留喺呢度都冇晒意思。
我喺呢度有過開心同唔開心嘅日子，開心嘅係我啲囝囝喺西班牙生活得好愉快，唔似我喺英超中學讀曼聯嗰陣，成日俾狗仔隊跟實，搞到冇晒私隱。唔開心嘅係，我喺皇馬班歷盡求學期嘅低潮，英格蘭國家隊曾經棄用我，呢個班會又因為我應承咗過檔美職聯中學，而一度罰我停學。
𠵱家卡特朗同卡比路話好後悔放我走，唉，我聽到好悶喇！我老婆維多莉亞好識精打細算，你哋容許我去美國搵埋最後一桶金，等我出嚟社會之後唔使憂啦！
西甲爭標形勢拆局
簡評：綜觀3強爭標形勢，以皇馬最為有利；他們只要在最後一周贏波，便毋須理會其餘兩隊的戰果而奪得冠軍。另外，由於皇馬在3隊中對賽成績最佳，如3隊最後同分，第1名將是皇馬，第2名為西維爾，第3名則為巴塞隆拿。
