暑假不遠了，好多家長已為子弟安排好去外國參加遊學團，主要係學英文。學生Y舊年去過英國，返嚟進步好多，第一：唔怕講英文，第二，講英文比較流利。無他者，遊學團安排學生寄宿於民居，家庭主婦為佢提供早餐、晚餐、食薯仔（冇飯食）時點都要同主人家溝通吓嘅，講得多就唔會怕醜。
本來以為學生Y今年再接再厲去英國遊學，點知學校介紹佢去香港大學參加一個課程，學費只需二千六百元，比去英國慳好多，由七月十二日起至七月三十一日止，朝九晚五咁上堂，一共三個星期，限中四至中七學生參加，由哈佛、耶魯、劍橋啲學生主持，應該有料到。
學生Y喺五月底走上去港大面試，心情有啲緊張，點知在場嘅只有十零個學生，港大主持人表示失望，將報名日期延長至六月六日。通常跑馬報名，唔夠馬參賽，馬會就會延長報名時間。估唔到呢個港大課程亦係如此，唔通香港學生睇見外國月亮圓，情願用兩萬幾三萬去英澳紐，都唔願意付出二千六去薄扶林？
學生Y見到咁少學生參加面試，成個人定晒，表現正常。左丁山問佢究竟讀啲乜，佢傳來一個網址： http://cse.cccef.org.hk，上網睇吓，乃係CrimsonSummerExchange，哈佛、耶魯、劍橋學生主理，今年到港大、浙江大學、北京大學辦課程，但唔係一般暑期英語班，而係文化交流討論班，學生需參加深入討論，講不同題目，相信香港學生完成課程之後，英語說話能力一定大大加強。
Crimson（深紅色）係哈佛大學「校色」。顧名思義。課程會以哈佛學生/校友為培訓導師嘅主力。按道理，呢個課程便宜過去外國好多，應受歡迎，誰知不然。左丁山問過一個家長，佢嘅反應係：「二千六蚊讀三星期？學費好貴啫。二萬六蚊去澳洲就唔貴，包食包住包機票喎！」去哈佛大學讀暑期英語班，八個星期需要八千美元，你話貴唔貴呢？每年都收生收唔切。但哈佛學生嚟香港辦課程，反應就差好遠嘞。