〈蘋果開倉〉今日較西甲提早一日煞科，我哋眾名家希望為呢個高收視嘅版面做齣好戲，小弟則以全日最正氣嘅美國隊喺美洲金盃大炒巴拿馬，作為今季終結。
今個夏天有排賭
𠵱家個球季暑假越縮越短，遲吓又有美洲國家盃同世青盃，至咗7月中圖圖盃同德聯盃又相繼進行；日賭夜賭，相信生活節奏急促嘅香港人都好難放鬆啲咯。
個人認為無論賭任何隔山打牛嘅賽事，都有一個自己心中既定嘅模式；好似美洲金盃同U21賽事，頭段狂開下盤，但入局後上盤開始抬頭，你捉唔捉到呢條路？
買波要耍長短棍
自己上周捧加拿大贏瓜德羅普，結果斷咗條7連勝嘅長勝路，不過之後喺擂台，再重注認定係今屆奪標黑馬嘅加拿大W，亦都本利歸還，仲開咗個勁筍嘅3倍幾「客勝」㖭。證明賭乜波都唔緊要，最重要喺策略用得好，有信心注碼不能縮。
記住喺呢個暑假，大家除咗繼續要珍惜個牛市第3期外，買波就要一定要識長短棍；即重心一注全日最有信心賽事，再小注互串3至4場過關，博有5、6倍回報，筆者喺呢兩個月大豐收亦係依循此路，希望大家呢個夏天一路曬太陽一路贏錢。
巴拿馬停兩件點頂
講番貼士，擁主場之利嘅美國喺今屆金盃分組賽開始時因為玩試陣，的確冇乜王者之風；不過上仗認真啲，即大勝薩爾瓦多；相信教練巴特利已經摸清球隊嘅特性，呢場對巴拿馬嘅8強淘汰賽，正氣之王美國冇得留咯。
巴拿馬實力已經唔及美國，最慘就係佢哋喺最後一場分組賽對墨西哥時，仲有後衞托利斯同埋中場路蘭度艾斯高巴被逐，今場要停賽，令巴拿馬實力進一步受損；而且呢場係淘汰賽，巴拿馬輸一球同輸幾球都冇分別，所以一旦早被美國取得入球，唔排除巴軍會谷晒上前搶攻，令後防呈現更多空位，咁美國就有機可乘嘞！「主勝」有1.75倍，有買趁早咯。
配腳則取大聯盟新貴紅牛W，仲有日職全日鋼膽大阪飛腳，各位球迷，8月再見！
重心出擊
讓球主客和
美國勝[-1]
蘋果波神
狂迷英國波，尊崇雲格；成與敗，視乎你是否找到真快樂！