新牌仔對馬路經驗着實有限，往往都有好多驚險百出、蝦碌搞笑嘅事件出現，就以悠穎馳一位考到私家車牌無幾耐嘅女性朋友B小姐為例，佢揸車出街信心爆棚，港九新界四圍去都無問題，惟獨偏偏唔見佢揸出揸入停車場，又或泊街邊咪錶位。悠穎馳忍唔住走去問佢因咩事泊街、出入停車場都要朋友代勞咁搞鬼？大家千祈唔好笑佢個答案，佢話生平第一次揸車出去兜風操車時本來好哋哋，點知返屋企泊車嗰陣就將停車場出入口搞亂咗，駛咗去出口嗰度，結果停車場出口勁窄，唔夠位拗彎走人，結果狠狠地撞爛車頭燈同泵把！可能你會話：咪咁衰啦，新牌仔夜麻麻返到屋企，一時分唔到出入口好閒啫。悠穎馳仲好記得B小姐當時臉都紅埋咁答：「唔係夜晚，係日光日白！」
悠穎馳
豪邁不羈，愛車如命，聽幾下引擎聲就知咩車！