女賓架D做到好高層，平時鍾意打高爾夫球，除此之外，就一味埋頭工作，睇報紙雜誌都以財經政治題材為主，其他就冇時間兼顧咯。高層行政人員，大都如此，因為佢哋每日與時間競賽，忙到死，點會睇一啲無補於決策（decisionmaking）嘅資料吖。
點知呢晚食飯，賓架D居然識得講碧咸。左丁山問佢：「乜你有時間睇足球咩？或者體育版？」賓架D笑笑口話：「邊會吖，但有時與同事、下屬交流，聽到佢哋講波，我都要搭句口嘅，睇報紙就唔會睇體育版、娛樂版嘞，但揸車返工之時，聽見電台節目主持人講碧咸，我咪又吸收吓囉。」
據賓架D講，佢唔少行家都係揸車返中環嘅，約有十五分鐘至三十分鐘（計埋塞車）時間聽收音機，絕大部份聽財經節目，一返到銀行，就已經約略知道世界大事，華爾街走勢以及英美澳紐有冇加息，有時仲知埋中國邊啲省市大官被「雙規」，知所避忌㖭。賓架D話：「聽財經節目好似聽咗主要新聞嘅ExecutiveSummary，幾好！」賓架D嘅見解，非佢獨有，一姐賓架M、一姐證券A都有咁樣講過。
講起啲一姐，搵佢哋都幾辛苦，因為佢哋周時飛，頻頻出差，有時飛到不知身在何方，好彩佢哋公司雖然慳錢，飛長程（四小時以上）仍然准佢哋坐商務客位，可以在機上瞓番一覺。商務位機票唔平㗎，閒閒哋四至六萬銀一張，基金F最近飛到牙痛，皆因來往幾次倫敦，就送咗二十幾萬銀畀國泰，故此牙痛咁聲。基金F呻機票貴，令左丁山諗起，一位富豪講過：「×××成日出埠，佢坐乜嘢客位呀？」旁邊有人答：「YClass」。富豪聽見就笑：「咁呀，我一年嘅頭等機票費用，咪多過佢份人工？」人比人，比死人，我哋千祈唔好同啲富豪比較。酒店小YY去LA來回，用Mileage（里程）積分博upgrade，俾佢博到，坐商務客位，返嚟大讚國泰商務客艙冇得彈，舒服到暈，跟住又自嘆里程分數冇晒咯，要再積蓄過。