窮途未必係末路，絕處仲可以去旅行。憑着這個信念，903節目《五天精華遊》兩個節目主持人卓韻芝（阿芝）同余廸偉（廸偉），傾家蕩產變賣家當都要儲錢去玩。最後二人儲了4萬多，決定搵埋日本通林慧美齊齊出發去東京Midtown搵食，豪歎A5和牛，再去搵地頭雞擦餐飽。
記者：梁學文
相片由被訪者提供
喜扇亭靚夜景伴擦靚牛
去日本豪食，點都要食一餐A5和牛。有靚牛食都未夠豪，仲要包房有專人幫你燒牛肉，又要有靚景的餐廳，林慧美就首推去東京Midtown的喜扇亭。一向以食鐵板燒和牛而聞名的喜扇亭，在全日本一共有11間分店，最新的一間就在東京Midtown的三樓。唔好以為三樓就唔夠高無咩景睇，其實已經可以飽覽東京的夜景。阿芝話：「開頭我都以為去三樓食飯無咩景睇，不過上到去一望，嘩！原來好正！你知日本啲樓底夠高，三、四樓都好似十樓咁，夜晚去到個景靚到呢！」好吸引，搞到我都好想去豪食一次呀！
燒牛肉的藝術 最緊要唔出聲
平時在香港食鐵板燒，一定會叮叮撐撐好鬼嘈，個個師傅都身懷絕技，務求在燒菜的過程之中表演一次給食客欣賞欣賞，好記得有次燒肉師傅用胳肋底表演擰黑椒，嘩，睇到目瞪又口呆，厲害就夠厲害，可是，那鐵板燒是給人吃的呀……
所以在喜扇亭這裏，師傅就只會聚精會神的專注燒，多餘的動作不會有。不要說動作，就算連半點多餘的聲音都唔會發出。值得，多加一成的價錢包房包師傅，換到一份專注的燒牛肉藝術表演，絕對值得。「食咁多次鐵板燒，我都未試過有個師傅唔出聲，半粒聲都唔出，務求唔發出任何聲音去煮好一餐。全晚真係無聽過佢講嘢，就算煮菜，都只有輕輕幾下鑊鏟聲。呢啲真係無聲煮食之藝術。不過，我昅到佢有偷偷哋裝吓我哋有無食晒啲嘢。」
A5牛勁過迷幻藥
日本和牛好食就一定，入口即溶更加不在話下，尤其是A5級的牛肉，更加是無得頂，廸偉放了半塊牛肉入口，經已講不出聲，好似食了迷幻藥一樣，只露出一副好滿足的笑容：「塊和牛一放入口，嘩，經已唔使講嘢，嗰一下真係好感動、好想喊。我哋叫咗兩款牛，分別係tenderloin同sirloin，估唔到tenderloin牛肉味同口感都唔及sirloin，尤其係sirloin邊位有啲肥，牛味又夠香又有咬口，雖然話幾個人食咗一萬銀，咁好食，多多錢我都願畀。」
除了牛肉之外，其實仲有其他食物都令人回味，款款都是師傅精心傑作，其中牛油炒飯，更加令人心醉，阿芝話：「好記得以前去北海道食蟹宴，最後一道菜係白飯，所以每次去日本都好想叫一碗白飯，我叫佢做感動之白飯。不過，今次真係好憤怒，輸晒！因為個牛油炒飯真係好好味，未放入口，齋聞經已好香。反之我個白飯，唉，真係就咁一個白飯……」「今次仲唔畀我贏番次！」廸偉好得戚咁話：「牛油真係堅牛油，其實係之前燒sirloin肥嗰部份，之前以為佢會掉咗佢，點知原來係留番做炒飯。師傅係咁易煎一煎啲肥油，然後加埋啲飯落去一齊煎，香到爆！」
價錢：特上steakset約$1,344/位
包房包師傅價：另加$268/位
Restaurantguide
喜扇亭東京Mid-town店
電話：（81）3-54137988
地址：東京都港區赤坂9-7-4東京Mid-town3F
營業時間：11:00am-9:30pm
Midtown藝術氣氛重
去六本木Midtown，就是為了去看看新的地標。Midtown就是集合了最新的東京設計生活於一身的地方，以MidtownTower為中心的新都市。Midtown結合了購物、美食、美術館同office等等，全部都是根據日本的傳統設計而出發。跟六本木山相比，Midtown沉實自然，卻好有藝術家的氣質，特別是整個設計都是用線條組合而成，網狀天幕、直線條子等，互相輝映。就算不入裏面安藤忠雄的21_21DesignSight，只是在Midtown閒逛，都一樣可以感受那份藝術氣氛。
誤打誤撞地頭雞
一心諗住行完21_21，就去食拉麵，行行吓，被好香的雞油味吸引住，誤打誤撞就去了食地頭雞。地頭雞是店名又是食物名，意思大約是地道走地雞。地頭雞只賣4款食物，只有雞雞雞雞。最特別的是冷汁地頭雞，用煎牛扒方法煎雞，只是煎雞肉的四面，再淋上自家製的醬汁，一上枱就有陣好香的醬汁味。放入口的感覺就好特別，外面煎到脆，入面就軟腍腍，中間仲係生生哋，好滑！食過之後，甚至覺得餘生或許也沒有機會再遇上這種味道了。另外，地頭雞仲有一款炭燒雞飯都是不可不吃，雞肉炭燒過後，味道特別可口。
Restaurantguide
地頭雞
地址：東京都港區六本木山巷
井之頭公園搵小食
食飽飽又想逛一陣，但是不逛商場，有其他選擇嗎？有，20分鐘JR車程就可以到達吉祥寺。吉祥寺裏頭沒有血拼式的購物地區，只有舒泰的漫遊地帶，尤其是到南口(即公園口)一帶，井之頭公園的寧靜幽雅，跟原宿比較，就像是尖沙嘴跟元朗。慢慢行，在公園散步亦是一件樂事。多行兩步又會餓，不用怕，在吉祥寺一帶有不少食肆，亦是搵食的好地方。其中一檔在公園河畔賣和菓子的，是阿芝心水推介之一，阿芝說：「呢檔和菓子只係賣兩種味，一係麵豉，另一款係豉油味。每次去親都會去幫襯。」
出門handbook
簽證：持特區護照或BNO均不用簽證到日本。
查詢：25221184（日本領事館）
機票：乘日本航空來往香港至日本，票價$3,550起，機票有效期7日。
查詢：34291288（日航天地旅遊）
貨幣：100日圓約兌6.4港元（文中價錢已折算為港幣）
時差：較香港快1小時
電壓：100V，雙扁腳插座
緊急聯絡電話：警察局110
長途電話國家區碼：81
有用網頁： http://www.jnto.go.jp
東京下周天氣多雲，19~28℃
