阿媽話：「食齋係情操，老了才見味道。」但我話：「我知食齋千般好，只係冇包裝令人興致唔高。」近日有齋舖創出新血路，搞快餐賣齋熱狗與齋漢堡，即時後生咗。趁今日初一，反帶阿媽食一次「快齋」。
記者：劉嘉蕙
攝影：楊錦文
Model：Algie（TheGroup）
唔賣滷味芝麻卷
第一次行過BuddhaHut，以為某連鎖快餐店開新舖，裝修光鮮，由餐牌、收銀到取餐都係快餐式經營，牆上的VideoWall投影專講環保新聞，的確係非一般齋舖，負責人王小姐話：「開張時俾人話唔賣齋滷味，又冇芝麻卷，點可以話自己係齋舖!」破格就要破到底，所以唔特別都唔做。冇傳統齋舖菜式，取而代之係家常小菜及極有「快餐Feel」的漢堡、熱狗及西餅等。王小姐話以快餐形式經營齋舖，無非想令齋菜更「入屋」，等客人食得更自在，「傳統齋菜好難一個人自己食，成個用餐過程較一板一眼，但係快餐店提供到自由空間，自己一個人食都得。」
沙律如堡包$18
相似度：★★★（５粒★為最似）
店內幾款包類都用上意大利包，王小姐話素意大利包冇搽蛋漿喺面，原本顏色較為暗啞，為咗令賣相好睇啲，特別叫師傅灑上一層糖霜喺包面。如扒無刻意扮魚味，但有豆香，有咬口，如果厚番少少仲好。
芒果慕絲蛋糕$18
相似度:★★★★★
素芒果蛋糕內容同一般冇大分別，只係用上素芝士，原來一般芝士嘅凝固過程中會加入凝乳劑，而牛胃液係凝乳劑嘅成份之一，素食者口痕想食芝士，真係要揀過先好擺入口。而呢個「蛋糕」餅底冇落蛋，入口更為鬆軟，感覺輕盈好多，我信佢真係唔肥。
潛水艇$19
相似度：★★
意大利包加素吞拿魚做餡的齋熱狗，食落口味清爽甜甜哋，有啲似食某法式快餐連鎖店三文治。素吞拿味道同真實版有九成相似。
素啤酒$12.5/支330ml
相似度：★★★★★
茹素之人滴酒不沾，所以呢個素啤酒都係取其過癮，其實不含酒精，樽上寫明大肚婆同小朋友都飲得。素啤酒倒落杯度一樣起泡，入口有麥香，略帶甜味。
食客街訪
關同學：「同媽咪嚟食過幾次，都幾好味，啲食物整得有新鮮感。」
北京食客王小姐：「今次旅行特登試呢間素快餐，味道不錯，環境亁淨。」
北京食客祈先生：「我在北京開素菜館，呢間快餐在素食界出咗名，我是慕名而來的，覺得食物真的不錯，值得推薦。」
BuddhaHut（27511321）
地址：牛頭角淘大商場第2期地下242-245號舖
營業時間：11:30am-11pm
座位：30個