英超、意甲、德甲等主流賽事已經收咗「咧」，最近就由美洲金盃及U21歐國盃，每日為大家提供思考平台。雖然，賭波嘅嘢，識嘅唔代表一定中，但係唔識，輸嘅機會就大啲噃！
好似美洲金盃，咁多支參賽球隊中，斷估最多人認識都係美國及墨西哥兩路大軍，畀大家嘅印象係喺呢個中、北美洲及加勒比海地區，通常都俾呢兩隊玩晒；相反，大家都可能識得海地、危地馬拉、薩爾瓦多呢啲，因為已認定咗佢哋係呢個地區嘅「魚腩部隊」。
瓜德羅普一鳴驚人
今屆有支新軍叫做瓜德羅普，睇個名加上聽吓人哋講，呢啲不見經傳地方，真係「瓜得囉噃」！但其實有條件上網搵吓料，就會知道呢個法屬地方屢出好手；𠵱家踢緊美洲金盃嗰班，過幾年分分鐘幫緊法甲或其他歐洲球隊打歐聯。
最慘嘅係，當大家見到呢隊不見經傳嘅瓜德羅普，喺分組賽對住同組熱門球隊如加拿大及哥斯達黎加，以為上盤戰果穩開啦，結果就輸得不明不白。所以，有啲賽事，遇上啲睇都未睇過，又全無往績可尋嘅球隊，咪再淨係諗埋一邊；好多時對於對賽兩軍，認識其中一隊多啲，另一隊就冇乜資料喺手，即係睇唔通個局！照賭都得，小注靠運氣幫幫手囉。
U21歐國盃情況亦一樣，𠵱家踢緊決賽周嗰8隊，相信又係冇幾多人之前睇過吓捷克、塞爾維亞及以色列係咩料子；最多人識嘅英格蘭、意大利及葡萄牙，喺第一輪秩序就已經輸死唔少人。
文：華度