近排天氣又熱又濕，未到7月就30幾度熱爆燈，搞到屋企班大人細路都無晒胃口食飯。唔通餐餐食沙律同冷菜？不如轉吓口味食咖喱，有助去濕熱，而且辣辣哋好醒胃。印度咖喱夠正宗，可惜咖喱材料唔係咁易買齊；泰國咖喱又太重香茅味，唔係個個都鍾意食。好在仲有印尼式咖喱，用蝦醬辣椒煮，口味近中菜，而且做法簡單又容易。
記者：梁學文 攝影：何家亮
鳴謝：ThePlace（35523200）
OrangeRed橙紅色
咖喱雞
需時：45分鐘
價錢：$30/4人份
材料：雞肉500克、薯仔70克
調味：葱100克、薑25克、蒜頭25克、香茅20克、黃薑10克、蝦醬3茶匙、咖喱葉1塊、咖喱磚25克、椰奶50克、糖1茶匙、鹽1茶匙、胡椒1茶匙、水50克
做法：先將薑/葱/蒜頭/香茅/黃薑/蝦醬/咖喱葉/咖喱磚煮熟，然後加入半杯水再煮，水亁撈起備用。雞肉拆肉之後，先輕煎至半熟，然後加入咖喱汁及薯仔再煮半小時。上枱前加入椰奶/糖/鹽/胡椒調味便可。
Yellow黃色
黃咖喱燜羊肉
需時：3小時
價錢：$50/4人份
材料：羊肉2千克、薯仔500克、紅蘿蔔250克
調味：葱700克、薑250克、蒜頭250克、香茅250克、辣椒醬250克、丁香10克、肉桂10克、豆蔻10克、黑椒25克、大茴香10克、椰奶100克、糖1茶匙、鹽1茶匙、水1/2升
做法：先將薯仔及紅蘿蔔放入滾水灼熟撈起備用，然後將羊肉輕煎4面備用。將葱/薑/蒜頭/香茅/辣椒醬/丁香/肉桂/豆蔻/黑椒/大茴香放入攪拌機攪碎，然後落鑊炒熟。跟住加入水再煮，待水滾後就加入羊肉/薯仔/紅蘿蔔一齊燜2小時。最後加入椰奶/糖/鹽調味，再燜30分鐘即成。
DeepRed深紅色
紅咖喱炒大蝦
需時：60分鐘
價錢：$40/4人份
材料：大蝦100克、紅椒10克、青椒10克
紅咖喱醬：紅咖喱100克、香茅40克、黃薑25克、葱250克、辣椒亁15克、薑55克
做法：大蝦剝殼後先洗淨及拆肉，待油滾後放入鑊炸至八成熟。將經已雪過夜的辣醬落鑊再炒，炒至熟變深紅色後，就加入大蝦一齊再兜勻，最後加入青椒同紅椒再炒便可。
紅咖喱醬做法：先將所有紅咖喱醬材料用攪拌機攪碎，待鑊熱後加油將紅咖喱醬材料炒熟，然後撈起，再放入雪櫃雪2至3日備用。
White白色
白咖喱鮮魷
需時：45分鐘
價錢：$35/4人份
材料：魷魚100克
調味：葱25克、薑10克、蒜頭10克、香茅25克、黃薑10克、咖喱葉1塊、蝦醬3茶匙、椰奶50克、糖1茶匙、鹽1茶匙、水50克
做法：先用5克的蒜頭將魷魚炒至半熟，然後撈起備用。加入葱/薑/5克蒜頭/香茅/黃薑/咖喱葉/蝦醬入鑊煮熟，再加入水再煮。待水滾後就可以加入魷魚一齊煮，待魷魚熟透後便加入椰奶/糖/鹽調味。
印尼咖喱常用材料
黃薑
可以治療氣血停滯的心痛、胸痛，味道辛辣，是一味很好的調味料，咖喱菜就用了黃薑的辛味，所以食時感覺到辣。
丁香
具有類似香草的強烈香氣，可以消除肉類腥味，煮肉類咖喱必備。
香茅
香茅具有檸檬香氣，味道清香宜人，無論新鮮或亁的香茅都有一種比檸檬更香的清香，煮咖喱落兩三條，令咖喱味增加一份清香感覺。
