上個禮拜，同事求大俠醒咗個筍盤畀細佬，我牽牛贏咗錢梗係要回禮啦，就一支益力多咁多！點知又撞到好嘢，就係禮拜日西甲，畢爾包主場戰利雲特，2/3落主隊單W，1/3注博[-1]嘅「主勝」！點解信心咁爆棚？睇落去咪知囉！
牽牛
查實當我送咗支益力多畀求大俠後，自己都有啲內疚，但性格單純兼大方嘅求大俠，竟以德報「怨」，知我冇時間食lunch，就買咗半打奶黃包畀我，仲留低句：「我星期六放假呀，你慢慢歎喇！」於是，我餓得滯起勢咁食，食食吓，咬到張紙條，上面寫住，「不宜飽」；起初，我仲懵懵吓，原來紙條內有玄機。
從未降班唔信邪
呢啲蠱惑嘢真係難唔到我牽牛，諗咗一陣，求大俠意思肯定係禮拜日場畢爾包對利雲特啦，「不宜飽」即係買畢爾包啦，仲送咁多個又甜又大嘅奶黃包畀我，肯定係有信心到可以買埋「主勝」！
好，講番理性嘅資料數據，現時排尾４嘅畢爾包查實喺西甲個底好深厚，事關咁多年歷史，得佢哋同皇馬、巴塞未曾試過降班；再講，佢哋向來有性格，夠堅持，衰啲嘅可以話係頑固，畢爾包自1912年起，只用巴斯克市長大嘅球員，其他外援一概免問！你話呢啲「味道」喺邊度搵呀？
雖說畢爾包今季主場只贏過5次，其中就包括華倫西亞、愛斯賓奴等戰力不俗之輩，如今降班危機深重，今仗要攞3分就可護級成功；相反，利雲特上仗砌低華倫後已告上岸，𠵱家煞科戰無欲無求，隊波又充斥「老油條」，尾場當「衞生波」踢等放假，實在係人之常情也。最慘都係利軍作客唔多得，全季贏得4場咁大把，你話點捧呀？
利雲特等收「咧」啦
畢爾包近年女子隊就威過威士忌喇，仲剛剛贏咗聯賽，已係近5季嘅第4次冠軍，男子隊梗係唔衰得啦；正所謂：「接過畢爾『包』，你就俾我炒。」利雲特坐定粒六冇目標，肯定等收「咧」，呢劑想唔大敗都難，大注押畢爾包開W，小注押[-1]嘅「主勝」！
熱選--大藍籌
星期日3
讓球主客和
畢爾包勝[-1]（2.1倍）
評語：畢爾包呢幾年護級多過食包，偏偏季季有驚無險，球員經驗如此豐富，利雲特呢場肯定俾大「包」啃親！
冷選--23線股
星期日20
波膽
馬德里體育會勝2:0（8.5倍）、3:0（20倍）
評語：馬體會想下季踢歐洲賽，首要條件係自己爭氣贏波，周日作客奧沙辛拿冇有怕！而佢哋贏波時又多唔失波，故吼實2:0、3:0就夠數。