成日話煮餸最緊要有鑊氣，講鑊氣，人人都話梗係鐵鑊最強！不過聽講鐵鑊亦有分生及熟，咁點分點揀好呢？又聽講用生鐵鑊一定要用韭菜同肥豬膏開鑊，係真唔係？放心，呢啲問題並非一個謎，即刻搵專家為大家解答。
記者：趙珮倩
攝影：譚盈傑、陳偉強
Model：Elaine@IG綜藝社群
資料提供：陳枝記老刀莊有限公司
生熟鐵鑊點樣分？
生鐵鑊鑊氣稱霸
賣鑊賣了80年的陳枝記負責人陳富釗先生指，生鐵鑊是將鐵燒紅倒模，鑊耳冇窩釘，比熟鐵鑊厚及重手，能抵受高溫不變形，論鑊氣絕對稱霸，不過易跌爛，如保養得好可用上10年。
買生鐵鑊要揀表面夠光滑，鑊底圓滑厚度均勻。買熟鐵鑊時，最好拍落去聽到響亮噹噹聲就為之靚。
熟鐵鑊易變形
用人手打鑄，鑊耳有窩釘穩固，鑊身較薄，不易跌爛。由於傳熱快，炒餸快熟亦夠鑊氣，缺點是燒得耐變形就要丟掉。一般酒樓每10日就要換一隻熟鐵鑊；住家用大概用到1年。
開鑊一定用韭菜
坊間一直傳授開鑊要以肥豬膏炸出豬油再加入韭菜炒勻，但陳生話其實任何食油都可以用來開鑊，效果差唔多。至於為何要用韭菜，他解釋：「韭菜纖維夠粗，人食落肚都有助清腸胃啦，用來開鑊可抓住更多沙泥污物，清得亁淨啲。」
生鐵鑊開鑊StepbyStep
刨光生鐵鑊開鑊StepbyStep
至於經過刨光的生鐵鑊毋須以韭菜開鑊省幾次咁煩，簡單3個步驟就搞掂。
砂紙去銹勁
鐵鑊的缺點就是易生銹，如果非經常使用，閒時最好掃層生油令佢滋潤一下，而平時洗鑊最好用洗鑊掃或鋼絲球，洗完鑊亦要用亁布徹底抹亁淨水份，避免生銹。
查詢：23847515
大廚「煮」婦撐硬生鐵鑊
記者訪問了幾位大廚以及兩位有廿幾年入廚經驗的家庭主婦，發現生鐵鑊果然是最受「煮」家歡迎，講到開鑊用鑊亦各有心得。
「呢隻生鐵鑊$39，用咗年幾仲好襟，用來炒菜燜嘢真係香啲！另外我都有用易潔鑊，幾百蚊隻，用幾個月刮花就要掉。聽講話生鐵鑊開鑊要用韭菜豬油，但我淨係燒熱鑊搽生油覺得OK，亦冇試過生銹。」
「我用過好多款鑊，不銹鋼鑊煮有汁料的餸菜易黐底，又易黑；陽極鑊一定要燒到好熱先好煮，否則一樣黐；易潔鑊唔耐用，用用吓都會黐底；始終都係生鐵鑊最好，可以用十幾年，炒出來嘅餸都好食啲！」
「我喺屋企都係用生鐵鑊，炒餸比用易潔鑊或不銹鋼鑊香啲，而且可以用幾年，又唔驚炒炒吓剷啲化學物質出嚟。點開鑊？燒熱隻鑊畀油掃勻，隨便將菜頭菜尾炒埋，其實乜嘢菜都冇所謂，旨在將啲雜質掃走。」
「我用熟鐵鑊，但易變形，好快玩完，但論鑊氣，熟鐵鑊點都勁過易潔鑊，不過喺正常情況下，易潔鑊炒出嚟嘅食物會亁淨啲。」
「生鐵鑊炒嘢香口啲，缺點係易生銹同太重，好難拋鑊。開鑊時可以用幾片薑、3至4束葱，放落燒紅嘅油鑊，捽透隻鑊，去除鐵臭腥味同雜質。」
